चिंचवड येथील फोर्बस मार्शल या नामवंत कंपनीला आंतरराष्ट्रीय सायबर चोरट्यांनी घातला 50 लाख रुपयांना गंडा

पिंपरी चिंचवड : चिंचवड येथील फोर्बस मार्शल या नामवंत कंपनीला आंतरराष्ट्रीय सायबर चोरट्यांनी 50 लाख रुपयांना गंडा घातल्याचा प्रकार समोर आला आहे. जर्मनी येथील एका कंपनीचा ई मेल हॅक करुन  फोर्बस मार्शल कंपनीकडून पाठविण्यात आलेले 50 लाख 27 हजार 437 रुपये अल्स्टर बँक आर्यलंड या खात्यात जमा करुन कंपनीची फसवणूक केली आहे. याप्रकरणी पिंपरी पोलीस ठाण्यात फसवणुकीचा गुन्हा दाखल करण्यात आला आहे.

 

फोर्बस मार्शल कंपनीच्या वतीने हेमंत गणेश झेंडे (वय 57, रा. तळेगाव दाभाडे) यांनी पिंपरी पोलिसांकडे फिर्याद दिली आहे.त्यानुसार अज्ञात व्यक्ती विरोधात गुन्हा दाखल करण्यात आला आहे.

 

मिळालेल्या माहितीनुसार,फोर्बस मार्शल या कंपनीचे जर्मनीतील डायकॉम कंपनीबरोबर व्यवसायिक संबंध आहे. सायबर चोरट्यांनी या दोन्ही कंपन्यांमधील व्यवहाराच्या माहितीचा डाटा चोरला. जर्मन कंपनीचा ईमेल हॅल करुन फोर्बस मार्शल या कंपनीला जर्मन कंपनीच्या ई मेलसारखा वाटणारा ई मेल पाठविला.

 

कंपनीमार्फत विनोद देशपांडे यांनी 6 ऑगस्ट ते 29 सप्टेंबर दरम्यान जर्मन कंपनीशी ई मेलवरुन संपर्क साधला होता. त्यानुसार त्यांनी जर्मनी कंपनीच्या ई मेल आयडीवर  50 लाख 27 हजार 437 रुपये (56 हजार 450 युरो) पाठविले. प्रत्यक्षात डायकॉम कंपनीचा ई मेल हॅक करुन ही रक्कम आंतरराष्ट्रीय सायबर चोरट्यांनी अल्टर बँक आर्यलंडच्या खात्यात जमा केल्याचे उघडकीस आले आहे. पिंपरी पोलीस तपास करीत आहेत़

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published.