अनैतिक संबंधावरुन जाब विचारल्याने पत्नीला मारहाण, या त्रासाला कंटाळून पत्नीची गळफास घेऊन आत्महत्या ; पिंपरी चिंचवडमधील घटना

पिंपरी चिंचवड : अनैतिक संबंधावरुन जाब विचारल्याने  विवाहितेला मारहाण केली तसेच घरगुती कारणावरून वाद घालून तिला मानसिक व शारीरिक त्रास दिला. या त्रासाला कंटाळून विवाहितेने गळफास घेऊन आत्महत्या केली. याप्रकरणी सांगवी पोलिसांनी आत्महत्येस प्रवृत्त केल्याप्रकरणी सासरच्या पाच जणांच्या विरोधात गुन्हा दाखल करत  पतीला अटक करण्यात आली आहे. ही घटना पिंपळे गुरव येथे १ एप्रिल २०१७ ते २८ मे २०२१ या कालावधीत घडली.

श्रुती प्रतीक कांबळे (वय २४) असे आत्महत्या केलेल्या विवाहितेचे नाव आहे. तिचा पती प्रतिक माणिक कांबळे (वय ३०) याला अटक करण्यात आली आहे. त्याच्यासह विवाहितेची सासू मंगल, सासूची बहीण शांताबाई, विवाहितेची नणंद ज्योती व तिचा पती जगदीश (सर्व रा. पिंपळे गुरव) यांच्याविरोधात गुन्हा दाखल करण्यात आला आहे.या प्रकरणी भीमा अंबाजी गायकवाड (वय ५२, रा. कात्रज) यांनी  फिर्याद दिली आहे.

पोलिसांनी दिलेल्या माहितीनुसार, प्रतीक कांबळे हा श्रुतीला घरगुती कारणावरून वाद घालून मानसिक व शारीरिक त्रास देत होता. प्रतीकचे एका महिलेशी प्रेमसंबंध असल्याचे श्रुतीला कळाले होते. या कारणावरून प्रतिक नेहमीच तिच्याशी वाद घालून मारहाण करत असे. सासरच्या लोकांचीही कधीही दोघांच्या भांडणात मध्यस्थी झाली नाही. शेवटी श्रुतीने राहत्या घरी गळफास घेऊन आत्महत्या केली. याबाबत गायकवाड यांनी तक्रार केली. आत्महत्येस प्रवृत्त केल्याप्रकरणी गुन्हा दाखल करून पोलिसांनी आरोपी प्रतीक याला अटक केली. सहाय्यक पोलीस निरीक्षक सतीश कांबळे पुढील तपास करत आहेत.

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published.