पिंपरी चिंचवडमध्ये सासरच्या जाचाला कंटाळून विवाहितेने केली आत्महत्या

पिंपरी चिंचवड : दोन मुलीचं झाल्या म्हणून साडेतीन वर्षे पती सहवासापासून वंचित ठेऊन माहेरहून पैसे आणण्यासाठी विवाहितेचा शारीरिक व मानसिक छळ केला. या जाचाला कंटाळून २२ वर्षीय विवाहितेने आत्महत्या केल्याची घटना घडली. हि घटना जून २०१९ ते ११ ऑक्टोबर २०२१ या कालावधीत रुपनीनगर, तळवडे तसेच हुनसनाळ, (ता. हुमनाबाद, जि. बिदर, कर्नाटक) येथे घडली.याप्रकरणी सासरच्यांवर चिखली पोलिसांत गुन्हा दाखल केला.

लक्ष्मण देवाप्पा कांबळे (रा. बिदर, कर्नाटक) यांनी फिर्याद दिली आहे. त्यानुसार संजय शंकर भाईकट्टे (रा. रुपीनगर, तळवडे), सासू पुतळाबाई शंकर भाईकट्टे, सविता महादेव मोरे, हारुबाई तानाजी बोडके, पारुबाई सचिन सुरवसे अशी गुन्हा  दाखल झालेल्यांची नावे असून संजय भाईकट्टे याला पोलिसांनी अटक केली.

पोलिसांनी दिलेल्या माहितीनुसार, लक्ष्मण कांबळे यांची २२ वर्षीय मुलगी सासरी नांदत असताना सासरच्या लोकांनी फ्लॅट खरेदीसाठी माहेरून पाच लाख रुपयांची मागणी केली. त्यासाठी तिचा शारीरिक व मानसिक छळ केला तसेच दोन मुली झाल्या म्हणून सुमारे साडेतीन वर्षे पती सहवासापासून वंचित ठेवले. तिला जीवन जगण्यास असह्य करून आत्महत्येस प्रवृत्त केल्याचे फिर्यादीत म्हंटले आहे.