पोलिस चौकीत तरुणीचा आत्महत्येचा प्रयत्न, आरोपी विरुद्ध गुन्हा दाखल

स्वारगेट: भर रस्त्यात विनयभंग केल्याप्रकरणी महर्षीनगर पोलिस चौकीत तक्रार देण्यासाठी आलेल्या तरुणीने ओढणीने आत्महत्या करण्याचा धक्कादायक प्रकार समोर आला आहे. याप्रकरणी स्वारगेट पोलिसांनी 19 वर्षांच्या तरुणीवर आत्महत्येस प्रयत्न केल्याचा गुन्हा दाखल केला आहे.

पोलिसांनी दिलेल्या माहितीनुसार, फिर्यादी तरुणी व मोहसीन खान हे दोघे ओळखीचे आहेत. तरुणीने स्वारगेट पोलिस ठाण्यात दिलेल्या फिर्यादीनुसार, पोलिसांनी मोहसीन तन्वीर खान (वय 21, रा. गुलटेकडी) याला अटक केली आहे.

खान याने या 28 ऑगस्ट रोजी फोन करून गुलटेकडी येथील व्हेईकल डेपोच्या ग्राउंडमध्ये तिला बोलविले. ही तरुणी रात्री 11 वाजता तेथे गेली असता खान याने तिच्या मनास लज्जा उत्पन्न होईल असे कृत्य केले. या घटनेची तक्रार देण्यासाठी फिर्यादी आपल्या नातेवाईकांना घेऊन मंगळवारी महर्षीनगर पोलिस चौकीत आली होती. तिची तक्रार नोंदवून घेत असताना पहाटे 4 वाजता ओढणीने आत्महत्या करण्याचा प्रयत्न केला. पोलिसांनी तिला असे करण्यापासून रोखण्याचा प्रयत्न केला. दरम्यान, तिच्यावर आता आत्महत्येचा प्रयत्न केल्याप्रकरणी गुन्हा दाखल करण्यात आला आहे.