फलटण प्रकरणातील निलंबित पोलीस उपनिरीक्षक गोपाल बदने पोलीस खात्यातून बडतर्फ

फलटण :येथील डॉक्टर आत्महत्या प्रकरणात रोज नवनवे खुलासे समोर येत आहेत. फलटण तालुक्यातील उपजिल्हा रुग्णालयात कार्यरत असलेल्या महिला डॉक्टरने आत्महत्या केल्यानंतर संपूर्ण महाराष्ट्र हादरला. या घटनेचे पडसाद राजकीय वर्तुळातही पडले. आत्महत्यापूर्वी डॉक्टर तरुणीने स्वतःच्या हातावर पोलीस उपनिरीक्षक गोपाळ बदने याने चार वेळा अत्याचार केल्याचं लिहित आत्महत्या केली होती. याप्रकरणी पोलीस अधिकाऱ्याला निलंबित करण्यात आले होते व पोलीस उपनिरीक्षक गोपाळ बदने आणि प्रशांत बनकर या दोन्ही आरोपींना अटक करण्यात आली होती. दरम्यान फलटणच्या डॉक्टर आत्महत्या प्रकरणातील प्रमुख आरोपी गोपाळ बदने याला पोलीस दलातून बडतर्फ करण्यात आल्याचा आदेश कोल्हापूर परिक्षेत्राचे विशेष पोलीस महानिरीक्षक सुनील फुलारी यांनी दिलाय. कलम 311 (2) अंतर्गत निलंबित पोलीस उपनिरीक्षक गोपाळ बदनेची शासकीय सेवा बडतर्फ करण्यात आली आहे

दरम्यान, फलटण प्रकरणातील निलंबित पोलीस उपनिरीक्षक गोपाल बदने याची खाते अंतर्गत चौकशीमध्ये धक्कादायक माहिती समोर आली आहे. चौकशी अधिकारी पोलीस निरीक्षक घनश्याम सोनवणे यांनी 72 तासामध्ये पोलीस अधीक्षक तुषार दोशी यांच्याकडे रिपोर्ट सादर केला आहे.