कसबा पेठेत न्यू गंधर्व बँडकडून अनधिकृत शेड व रस्त्यावर गाड्यांचे अतिक्रमण; नागरिक त्रस्त

पुण्यातील कसबा पेठ परिसरात न्यू गंधर्व बँड या व्यवसायिकाकडून अनधिकृत शेड उभारणे, डेकोरेशनचे साहित्य सार्वजनिक जागांवर अस्ताव्यस्त ठेवणे आणि बँडच्या गाड्या रस्त्यावर उभ्या करून वाहतुकीला अडथळा निर्माण केल्याचा गंभीर आरोप स्थानिक नागरिकांनी केला आहे. या प्रकारामुळे परिसरातील रहिवाशांना मोठ्या प्रमाणात गैरसोय सहन करावी लागत असून नागरिकांमध्ये तीव्र नाराजी पसरली आहे.

स्थानिकांच्या म्हणण्यानुसार, संबंधित बँड व्यवसायिकाने कोणतीही अधिकृत परवानगी न घेता अनधिकृत शेड उभारले आहेत. तसेच रस्त्यावर सतत बँडच्या गाड्या पार्क केल्याने वाहतुकीची कोंडी होत असून पादचारी, स्थानिक वाहनधारक आणि आपत्कालीन सेवांनाही अडचणी निर्माण होत आहेत. डेकोरेशनचे साहित्य व इतर सामान सार्वजनिक जागेत टाकल्याने परिसरात अस्वच्छता वाढत आहे.

या समस्येबाबत परिसरातील नागरिकांनी अनेकदा संबंधित व्यवसायिकाला समज देण्याचा प्रयत्न केला, मात्र त्याने त्याकडे दुर्लक्ष केल्याचे सांगण्यात आले. अखेर संतप्त झालेल्या जवळपास शंभरहून अधिक नागरिकांनी एकत्र येऊन महानगरपालिका, स्थानिक प्रशासन आणि पोलिसांकडे लेखी अर्जाद्वारे तक्रारी दाखल केल्या आहेत.

तरीही अद्याप ठोस कारवाई न झाल्याने नागरिकांमध्ये रोष वाढत आहे. प्रशासनाने तातडीने जागेची पाहणी करून अनधिकृत शेड हटवावीत, रस्त्यावरील अतिक्रमण दूर करावे आणि नियमभंग करणाऱ्या संबंधितांवर कठोर दंडात्मक कारवाई करावी, अशी जोरदार मागणी नागरिकांकडून करण्यात येत आहे. कारवाई न झाल्यास आंदोलनाचा इशाराही देण्यात आला आहे.