वर्चस्ववादाच्या संघर्षातून ९ ते १० जणांच्या टोळक्याने केले हत्यारांनी चौघांवर वार

पुणे : वर्चस्ववादाच्या संघर्षातून सराईत गुन्हेगारांच्या ९ ते १० जणांच्या टोळक्याने काेयत्यासह कुऱ्हाड, पालघनसारख्या हत्यारांनी चौघांवर वार केला. या हल्ल्यात चार जण जखमी झाले असून, एक १९ वर्षीय तरुण गंभीर जखमी आहे. ही घटना मीनाताई ठाकरे वसाहतीतील क्रिसेंट हायस्कूल परिसरात रविवारी रात्री १० च्या सुमारास घडली.

या घटनेत प्रकाश तुळशीराम पवार (वय १९, रा. मीनाताई ठाकरे वसाहत) हा गंभीर जखमी झाला असून, त्याच्यावर ससून रुग्णालयात उपचार सुरू आहेत. तर सूर्या ऊर्फ सूरज ताज मोहम्मद सिद्दीकी, राकेश ऊर्फ लल्लु रतन सरोदे, आदित्य साखरे हे जखमी झाले आहेत. याबाबत प्रकाश पवार याचा भाऊ आकाश पवार (वय २८, रा. हडपसर) याने स्वारगेट पोलिसांकडे फिर्याद दिली आहे. पोलिसांनी बालाजी उमाप, अजय डिकळे, रोहित जाधव, यश माने, राजा मॅडम या ५ जणांना अटक केली आहे. तर सचिन माने याच्यासह इतर ५ साथीदारांवर खुनाचा प्रयत्न केल्याचा गुन्हा दाखल केला आहे.