हातात पिस्टल घेऊन परिसरात दहशत पसरवणारा आरोपी गजाआड

पिंपरी : हातात पिस्टल घेऊन परिसरात दहशत पसरवणाऱ्या तरुणाला निगडी पोलिसांनी अटक केली आहे. त्याच्याकडून देशी बनावटीचे पिस्टल जप्त करण्यात आले आहे. हा प्रकार सोमवारी (दि.4) रात्री आठच्या सुमारास ट्रान्सपोर्टनगर येथील रायगड हॉटेल जवळ घडला आहे.

आदर्श उर्फ छोट्या अशोक मगर (वय-24 रा. मधुकर पवळे शाळेसमोर, ओटास्कीम निगडी, पुणे) याच्यावर आर्म अॅक्ट महाराष्ट्र पोलीस अॅक्ट क्रिमिनल लॉ अमेंडमेंट अॅक्ट नुसार गुन्हा दाखल करुन अटक केली आहे. याबाबत पोलीस नाईक बाळासाहेब महालींग नंदुर्गे यांनी निगडी पोलीस ठाण्यात फिर्य़ाद दिली आहे.

पोलिसांनी दिलेल्या माहितीनुसार, आरोपी आदर्श उर्फ छोट्या मगर याने ट्रान्सपोर्टनगर येथील सार्वजनिक रोडवर हतात
देशी बनावटीचे पिस्टल घेऊन परिसरात दहशत माजवली. हातातील पिस्टल उंचावून मोठमोठ्याने ओरडून लोकांना
धमकवले. याबाबत निगडी पोलिसांना माहिती मिळताच पोलिसांनी घटनास्थळी जाऊन आरोपीला ताब्यात घेतले.
त्याच्याकडून 25 हजार रुपये किंमतीचे देशी बनावटीचे पिस्टल जप्त केले आहे.
पुढील तपास पोलीस उपनिरीक्षक सातपुते करीत आहेत.