स्वारगेट पोलिसांच्या रेकॉर्डवरील तडीपार आरोपी जेरबंद; गुन्हे शाखा युनिट 2 ची कारवाई

पुणे: स्वारगेट पोलीस ठाण्याच्या रेकॉर्डवरील तडीपार आरोपी शाबीर महंमद शेख उर्फ शाहू (वय ३५, रा. इंदिरानगर झोपडपट्टी, गुलटेकडी, पुणे) याला गुन्हे शाखा युनिट २ च्या पथकाने सापळा रचून अटक केली आहे.

गुन्हे शाखा युनिट २ मधील पोलीस कर्मचारी संदीप शिर्के, विशाल दळवी आणि ऋषीकेश व्यवहारे हे परिसरात पेट्रोलिंग करत असताना गुप्त बातमीदारामार्फत माहिती मिळाली की, तडीपार आरोपी शाबीर शेख हा अथर कंपनीसमोर डायस प्लॉट परिसरातील फुटपाथवर थांबलेला आहे.

माहितीची खातरजमा करून पोलिसांनी तातडीने घटनास्थळी सापळा रचत आरोपीला ताब्यात घेतले. त्याच्या गुन्हे अभिलेखांची तपासणी केली असता त्याच्याविरुद्ध स्वारगेट पोलीस ठाण्यात जुगार कायद्यांतर्गत तब्बल १२ गुन्हे दाखल असल्याचे समोर आले.

पोलीस उपआयुक्त, झोन २, पुणे शहर यांनी त्याला दोन वर्षांसाठी तडीपार केले होते. मात्र तडीपार आदेशाचे उल्लंघन करून तो पुणे शहरात वावरत असल्याचे निष्पन्न झाल्याने त्याच्याविरुद्ध स्वारगेट पोलीस ठाण्यात गुन्हा रजिस्टर क्रमांक ११९/२०२६ नुसार महाराष्ट्र पोलीस कायदा कलम १४२ अंतर्गत गुन्हा दाखल करण्यात आला आहे.

आरोपीची वैद्यकीय तपासणी करून पुढील कारवाईसाठी त्याला स्वारगेट पोलीस ठाण्याच्या ताब्यात देण्यात आले आहे.

ही कारवाई सहायक पोलीस आयुक्त (गुन्हे-१) श्री. शैलेश संखे यांच्या मार्गदर्शनाखाली प्रभारी पोलीस निरीक्षक अश्विनी जगताप, सहायक पोलीस निरीक्षक अमोल रसाळ तसेच संदीप शिर्के, विशाल दळवी, शंकर नेवसे, विनोद चव्हाण, ऋषीकेश व्यवहारे आणि सद्दाम तांबोळी यांच्या पथकाने केली.