पवना नगरातील हॉटेलमध्ये दादागिरी; कर्मचाऱ्यांना धमक्या देत मोबाईलवर शूटिंग

लोणावळा;पवना नगर परिसरातील एका हॉटेलमध्ये नुकतीच धक्कादायक घटना घडली. एक व्यक्ती आपल्या कुटुंबासह हॉटेलमध्ये आला होता. हॉटेल परिसरातील पाण्याच्या दिशेने जाणे धोकादायक असल्याने सुरक्षेच्या कारणास्तव कर्मचाऱ्यांनी त्यांना त्या बाजूला जाऊ नका, अशी विनंती केली.

मात्र एवढ्यावरून संबंधित व्यक्ती संतापल्याचे सांगितले जात आहे. “मी कोण आहे हे तुम्हाला माहिती आहे का?” असे म्हणत त्याने कर्मचाऱ्यांशी अरेरावी सुरू केली. त्यानंतर त्याने मोबाईल काढून शूटिंग करण्यास सुरुवात केली व “हे हॉटेल बंद करून दाखवतो,” अशा शब्दांत धमक्या दिल्या.

हॉटेलमधील कर्मचाऱ्यांनी शांतपणे “आमच्यासाठी सर्व ग्राहक सारखेच आहेत,” असे सांगण्याचा प्रयत्न केला. मात्र संबंधित व्यक्ती सतत मोठमोठ्याने बोलत राहिल्याने परिसरात काही काळ तणावाचे वातावरण निर्माण झाले. या प्रकारामुळे इतर ग्राहकांनीही नाराजी व्यक्त केली.