वारज्यातील गोकुळनगरात 15 वाहनांची तोडफोड

वारजे माळवाडी परिसरातील गोकुळनगर येथील पठार येथील मोकळ्या मैदानात पार्क केलेल्या १५ वाहनांवर दगडफेक करुन दहशत पसरविण्याचा प्रयत्न करण्यात आला.

याबाबत बाळासाहेब धानप्पा सोनावणे (वय ४८, रा. गोकुळनगर पठार, वारजे माळवाडी) यांनी वारजे माळवाडी पोलीस ठाण्यात फिर्याद दिली आहे. हा प्रकार २१ डिसेंबर रात्री १० ते रविवारी २२ डिसेंबर सकाळी साडेसात वाजेच्या दरम्यान घडला.

पोलिसांनी दिलेल्या माहितीनुसार, वसाहतीचा भाग असलेल्या गोकुळनगर पठारावरील मैदानात अनेक जण आपली वाहने पार्क करतात. रविवारी पहाटेच्या सुमारास टोळक्याने मिनी बस, ट्रक, रिक्षा, टेम्पो, चारचाकी कार, हायवा अशा १५ वाहनांवर दगडफेक करुन त्यांचे नुकसान केले आहे. या घटनेतील एका आरोपीचा पठारावरील रिक्षाचालकाशी वाद झाल्याने त्याने साथीदारासह येऊन ही तोडफोड केली. या तोडफोडीचे सीसीटीव्ही फुटेज मिळाले आहे. पोलिसांनी दोघांना ताब्यात घेतले आहे.

पुढील तपास पोलीस हवालदार देशमुख तपास करीत आहेत.