पुणे : नंदु नाईकच्या मटका अड्ड्यावर खडक पोलिसांची धडक कारवाई, महापालिकेच्या अतिक्रमण विभागाकडून इमारत जमीनदोस्त

पुणे: मटका किंग नंदकुमार नाईक याच्या शुक्रवार पेठेतील मटका अड्ड्यावर खडक पोलिसांनी धाड घालून मटका घेणार्‍या दोघा रायटरला पकडले. त्याचवेळी नंदकुमार नाईक जेथे मटका अड्डा चालवत होता, ती इमारत महापालिकेच्या अतिक्रमण विभागाने पाडून टाकली.

अविनाश प्रमोद पाठक (वय ४९, रा. शुक्रवार पेठ), सुरज जोखन सहाणी (वय ३६, सध्या रा. रौनक हॉटेल, शुक्रवार पेठ, मुळ रा. हडकोडा, निसलवर, जि. महाराजगंज, उत्तर प्रदेश) अशी अटक केलेल्यांची नावे आहेत.

याबाबत पोलीस अंमलदार आशिष आदिनाथ चव्हाण यांनी खडक पोलीस ठाण्यात फिर्याद दिली आहे. मटका अड्डा चालविणारा नंदकुमार बाबुराव नाईक (वय ७२, रा. शुक्रवार पेठ) याच्यावर गुन्हा दाखल केला आहे.

मटका किंग नंदकुमार नाईक याच्या शुक्रवार पेठेतील या मटका अड्ड्यावर खडक व गुन्हे शाखेने आतापर्यंत किमान ७ ते ८ वेळा कारवाई केली आहे. असे असतानाही तो काही दिवसांनी पुन्हा मटका अड्डा सुरु करताना दिसून येत होता.

खडक पोलीस ठाण्याचे पोलीस पथक गस्त घालत असताना पोलीस अंमलदार आशिष चव्हाण यांना माहिती मिळाली की, नंदकुमार नाईक याचा मटका अड्डा पुन्हा सुरु झाला आहे. त्यानुसार खडक पोलीस पथकाने मंगळवारी सायंकाळी साडेसहा वाजता रौनक हॉटेलसमोर सापळा रचून दोघांना पकडले. ते कोर्‍या कागदावर आकडे लिहून घेऊन चिठ्ठ्या तयार करुन ग्राहकांना देत़ जुगाराचे आकड्यावर पैसे लावून लोकांकडून पैसे घेऊन त्यांना चिठ्ठ्या देत होते. त्यांना पकडल्यावर त्यांनी नंदकुमार नाईक याच्या सांगण्यावरुन या चिठ्ठ्या घेत असल्याचे सांगितले. त्यांच्याकडून १२९० रुपये, मोबाईल व जुगाराचे साहित्य जप्त केले आहे. पोलीस हवालदार पेरणे तपास करीत आहेत.

महापालिकेने नंदकुमार नाईक याचा मटक्याचा अड्डा चालत असलेल्या इमारतीवर कारवाई करुन ती जमीनदोस्त केली.