अपघातात गाडी पेटल्याने बायकोचा मृत्यू, पतीचा बनाव अखेर उघड

जालना : दाम्पत्याच्या कारला भीषण अपघात होऊन गाडीने पेट घेतल्यामुळे पत्नीचा होरपळून मृत्यू झाल्याची घटना गेल्या आठवड्यात समोर आली होती. या प्रकरणात आता नवा ट्विस्ट आला आहे. पतीनेच पत्नीला पेटवून ठार मारल्याचा आरोप आहे. लग्नाला तेरा वर्ष उलटूनही मूल होत नसल्याच्या रागातून पतीनेच हे संतापजनक कृत्य केल्याचा दावा आहे. मृत विवाहितेच्या भावाने दिलेल्या फिर्यादीवरून त्या नराधम पतीविरुध्द खुनाचा गुन्हा दाखल करण्यात आला आहे.

जालना जिल्ह्याच्या परतुर तालुक्यातील कारळा येथील रहिवासी असलेल्या ३५ वर्षीय अमोल गंगाधर सोळंके याने ३२ वर्षीय पत्नी सविता अमोल सोळंके हिची हत्या केल्याचा आरोप आहे.

पती अमोल पत्नी सविताला मारहाण करायचा, शारीरिक आणि मानसिक त्रास द्यायचा, घटस्फोटाची मागणीही करायचा. मात्र पत्नी तयार नव्हती. याच रागातून त्याने बायकोचा काटा काढण्याचा निर्णय घेतल्याची माहिती आहे.