पुणे : वाघोली अपघात प्रकरणात डंपर मालक अटकेत

वाघोली: वाघोली अपघात प्रकरणात डंपर मालकाला पोलिसांनी अटक केली. डंपरवरील चालक मद्यप्राशन करत असल्याची माहिती मालकाला होती. निष्काळजीपणाचा ठपका ठेवून पोलिसांनी डंपर मालकाला अटक केली. अनिल काटे (वय ३९, रा.दापोडी) असे अटक करण्यात आलेल्याचे डंपर मालकाचे नाव आहे. वाघोलीतील केसनंद फाटा सोमवारी मध्यरात्री भरधाव डंपरने पदपथावर झोपलेल्या नऊ जणांना चिरडले. अपघातात दोन बालकांसह तिघांचा मृत्यू झाला. अपघातात सहा जण जखमी झाले. पदपथावर झाेपलेले सर्व जण अमरावती जिल्ह्यातील असून, ते मजुरीसाठी पुण्यात आले होते. अपघात प्रकरणात वाघोली पोलिसांनी सोमवारी डंपर चालक गजानन शंकर तोटरे (वय २६, सध्या रा. केसनंद, मूळ रा. पाळा, ता. मुखेड, जि. नांदेड) याला अटक केली. त्याला न्यायालयाने २७ डिसेंबरपर्यंत पोलीस कोठडीत ठेवण्याचे आदेश दिले.

याप्रकरणाचा तपास करताना पोलिसांनी डंपर मालक अनिल काटे याला वाघोली पोलीस ठाण्यात चौकशीसाठी बोलाविले. डंपर चालक तोटरे याला दारु पिण्याचे व्यसन होते. याबाबतची माहिती डंपर मालक काटे याला होती, अशी माहिती तपासात मिळाली. डंपर चालक तोटरे याने डंपरमधील माल आव्हाळवाडी परिसरात उतरविला होता. त्यानंतर तो डंपर घेऊन घरी निघाला होता. डंपरमध्ये त्याने मद्य प्राशन केल्याचे तपासात उघडकीस आले. त्यानंतर पोलिसांनी काटेला अटक केली, अशी माहिती वाघोली पोलीस ठाण्याचे वरिष्ठ पोलीस निरीक्षक पंडीत रेजितवाड यांनी दिली.

डंपर मालक काटे याला चालक तोटरे मद्य प्राशन करतो, याची माहिती होती. मद्य प्राशन करुन डंपर चालवू नको, याबाबतची सूचना काटे याने देणे अपेक्षित होते. मूळात डंपर चालक मद्य प्राशन करतो, याबाबतची माहिती मिळाल्यानंतर त्याला कामावर ठेवणे योग्य नव्हते. काटे याच्या निष्काळजीपणा अपघातास कारणीभूत ठरला. त्यानंतर त्याला अटक करण्यात आली, अशी माहिती पोलिसांनी दिली. वरिष्ठ पोलीस निरीक्षक पंडीत रेजितवाड तपास करत आहेत.

मृतांवर अमरावतीत अंत्यसंस्कार

अमरावतीत पुण्यात मजूरी करण्यासाठी आलेल्यांची परिस्थिती हलाखीची आहे. वाघोलीतील अपघातात विशाल विनोद पवार (वय २२), वैभवी रितेश पवार (वय १ वर्ष) आणि वैभव रितेश पवार (वय २ सर्व रा. अमरावती) यांचा मृत्यू झाला. मृतदेह घेऊन जाण्यासाठी मजुरांना वाहन उपलब्ध नव्हते. प्रशासनाने त्यांना वाहन उपलब्ध करुन दिले, तसेच त्यांना अमरावतीत जाण्यासाठी बस उपलब्ध करुन दिली. अमरावतीत मृतांवर अंत्यसंस्कार करण्यात आले. अपघातातील गंभीर जखमींवर ससून रुग्णालयात उपचार सुरू आहेत.