मोटारीची काच फोडून पावणेतीन लाखांचा ऐवज केला लंपास*; चोरट्यांविरुद्ध गुन्हा दाखल

पुणे: पार्क केलेल्या कारची काच फोडून सोन्याचे दागिने, रोकड असा दोन लाख ८७ हजारांचा ऐवज चोरट्यांनी चोरून नेल्याची घटना सिंहगड रोड परिसरात घडली.

याप्रकरणी चोरट्यांविरुद्ध चंदननगर पोलिसांनी गुन्हा दाखल केला. याबाबत एकाने चंदननगर पोलीस ठाण्यात तक्रार दिली आहे. पोलिसांच्या माहितीनुसार, तक्रारदार कार चालक शनिवारी सायंकाळी खराडी भागातून निघाले होते. मिठाई खरेदीसाठी त्यांनी कार एका मिठाई विक्री दुकानाजवळ सायंकाळी साडेसातच्या सुमारास लावली.

कारमधील पिशवीत सोन्याचे दागिने आणि रोकड असा ऐवज होता. चोरट्यांनी कारची काच फोडून ऐवज असलेली पिशवी चाेरून नेली. मिठाई खरेदी करुन पंधरा मिनिटांनी ते मोटारीजवळ आले. तेव्हा मोटारीची काच फोडून ऐवज चोरून नेल्याचा प्रकार उघडकीस आला. सहायक पोलीस निरीक्षक सिद्धनाथ खांडेकर तपास करत आहेत. सिंहगड रस्ता भागात गेल्या आठवड्यात एका मोटारीची काच फोडून चोरट्यांनी २८ हजार रुपयांचा ऐवज चोरुन नेला होता. याबाबत एका तरुणीने सिंहगड रस्ता पोलीस ठाण्यात फिर्याद दिली होती. शहर, तसेच उपनगरात मोटारीची काच फोडून ऐवज चोरणारी टोळी सक्रीय झाली आहे.