दंडात्मक कारवाई केल्याच्या रागातून चक्क वाहतूक पोलिसाला भररस्त्यात लाथाबुक्क्यांनी मारहाण, आरोपी गजाआड

आळंदी (पुणे): वाहतूक पोलिसाने दंडात्मक कारवाई केल्याच्या रागातून एका तरुणाने वाहतूक पोलिसाला भररस्त्यात लाथाबुक्क्यांनी मारहाण केल्याची घटना शुक्रवार (दि.३) मरकळ चौक आळंदी येथे घडली.

आळंदी वाहतूक शाखेतील सहायक पोलिस उपनिरीक्षक अंकुश वाडेकर यांनी शुक्रवारी आळंदी पोलिस ठाण्यात फिर्याद दिली. त्यावरून विजय नामदेव जरे (वय-३३, रा. गोपाळपुरा, चाकण चौक, आळंदी) याला अटक करण्यात आली आहे.

पोलिसांनी दिलेल्या माहितीनुसार, फिर्यादी वाडेकर हे मरकळ चौक, आळंदी याठिकाणी वाहतूक नियमन करीत होते. त्यावेळी जरे याने फिर्यादी वाडेकर यांनी यापूर्वी त्याच्या गाडीवर पावती टाकल्याचा राग मनामध्ये धरून, तुला माहीत नाही का, मी स्थानिक आहे. गाडीवर तू पावती का करतो, तुला इथे राहायचे नाही का?, अशी धमकी दिली. त्यानंतर जरे याने फिर्यादी वाडेकर यांनी घातलेल्या शर्टाची गचांडी पकडून शर्टाची बटने तोडली.

वाहतूक पोलिस वाडेकर यांच्या गालावर जोरात हाताने चापट मारली. त्याला प्रतिकार करण्याचा प्रयत्न केला असता, पुन्हा त्याने फिर्यादीच्या डोक्यात व छातीवर लाथाबुक्क्यांनी मारहाण केली. या घटनेमुळे मरकळ चौकात वाहतूक कोंडी झाली. दरम्यान, आळंदी पोलिसांनी संशयिताला सरकारी कामात अडथळा आणल्याप्रकरणी अटक केली आहे.