बेकायदा पार्किंगमुळे वाहतुकीस अडथळा, पिंपरी-चिंचवड पोलिस आयुक्तालयांतर्गत मोठी कारवाई

पिंपरी: बेकायदा पार्किंगमुळे वाहतुकीस अडथळा निर्माण होऊन वाहतूक कोंडी होऊ शकते, याचा कसलाही विचार केला जात नाही. मात्र, त्याविरोधात वाहतूक पोलिसांनी जोरदार कारवाई सुरू केली असून नियमांचे उल्लंघन करून रस्त्यावर कुठेही वाहन करणे आता चालकांना चांगलेच महागात पडत आहे.

पिंपरी-चिंचवड पोलिस आयुक्तालयांतर्गत टोइंग व्हॅन योजना कार्यान्वित करण्यात आली आहे. या अंतर्गत वाहतुकीस अडथळा ठरतील, अशी वाहनांना टोइंग करुन दंड आकारण्याबाबत कारवाई जोरात सुरू आहे. मागील महिनाभरात विविध वाहतूक विभागांतर्गत ५ हजार ८४५ वाहनांवर टोइंग कारवाई करण्यात आली असून ३२ लाख ८५ हजारांचा दंड वसूल करण्यात आला आहे.

पिंपरी-चिंचवड पोलिस आयुक्तालयाच्या रस्त्यांवर वाहनांची वर्दळ असते. अनेकजण दुचाकी व चारचाकी वाहनांचा वापर करीत असतात. मात्र, काहीजण पार्किंगचे नियम न पाळता बेशिस्तरित्या कुठेही वाहन उभे करतात. अशी स्थिती अनेक मार्गांवर पाहायला मिळते. त्यामुळे वाहतुकीस अडथळा निर्माण होतो, अशा वाहनांवर पिंपरी-चिंचवड वाहतूक विभागाकडून कारवाईचा बडगा उगारला जात आहे.

– दुचाकी वाहन टोइंग केल्यास त्या वाहनाला ५०० रुपये दंड, २०० रुपये टोइंग शुल्क आणि ३६ रुपये जीएसटी असा एकूण ७३६ रुपयांच्या दंडाची वसुली

– चारचाकी वाहनाला ५०० रुपये दंड, ४०० रुपये टोइंग शुल्क आणि ७२ रुपये जीएसटी असा एकूण ९७२ रुपयांचा दंड

– टोइंग कारवाई केलेल्या वाहनांवर पूर्वीचा दंड प्रलंबित असल्यास प्रलंबित दंडापैकी किमान एक दंड टोइंगच्या दंडासोबत भरणे बंधनकारक

वाहन रस्त्यावर कुठेही बेकायदेशीर, अस्ताव्यस्तपणे उभे केल्यास टोइंग व्हॅनद्वारे कारवाई केली जात आहे. ही कारवाई यापुढेही सुरू राहणार आहे. तरी वाहन चालकांनी नियमांप्रमाणेच वाहन उभे करावे, जेणेकरून वाहतुकीस अडथळा निर्माण होणार नाही.

– बापू बांगर, पोलिस उपायुक्त, वाहतूक शाखा, पिंपरी-चिंचवड

सुमारे ५ हजार वाहनांवर कारवाई

शहरात ५ डिसेंबर २०२४ पासून कारवाईला सुरुवात झाली. यासाठी वाहतूक विभागांना टोइंग व्हॅन देण्यात आल्या आहेत. मागील महिनाभरात विविध ठिकाणी ५ हजार ८४५ वाहनांवर टोइंग कारवाई करण्यात आली आहे. तर ३२ लाख ८५ हजारांचा दंड वसुल करण्यात आला आहे.