कीरकोळ कारणावरून पिता-पुत्राला बेदम मारहाण, तिघांवर गुन्हा दाखल

पिंपरी; पिता-पुत्राला शिवीगाळ, मारहाण केल्याप्रकरणी तिघांवर गुन्हा दाखल झाला आहे. ही घटना पिंपरीतील लक्ष्मी मार्केट येथे घडली. याप्रकरणी रोहित विशाल वावरे (रा. रेल्वे स्थानकाशेजारी, पिंपरी) यांनी फिर्याद दिली आहे.

त्यानुसार अमर रणजीत कदम (वय २६), राहुल रणजीत कदम (वय ३५) व बबलू रणजीत कदम (वय ३०, सर्व रा. लक्ष्मी मार्केट, पिंपरी) यांच्यावर गुन्हा दाखल झाला आहे.

पोलिसांनी दिलेल्या माहितीनुसार, फिर्यादी व त्यांचे वडील हे त्यांचे चावीचे दुकान बंद करीत असताना दुकानासमोर राहणारे आरोपी तेथे आले. ‘गाणी कोण वाजवतेय’ असे म्हणत शिवीगाळ करीत असताना फिर्यादीच्या वडील म्हणाले की, गाणी वाजवणारी मुले निघून गेली. या कारणावरून आरोपींनी त्यांना शिवीगाळ व मारहाण केली. त्यावेळी फिर्यादी यांनी अमर कदम यास वडिलांना शिव्या का देतोस असे म्हणाले असता, त्याने फिर्यादी यांनाही शिवीगाळ करून टोकदार टोच्याच्या साहाय्याने कपाळावर मारून जखमी केले.