धक्कादायक! कात्रीने गळ्यावर वार करुन केला पत्नीचा खुन; खराडीमधील पहाटेची घटना

खराडी (पुणे): घरगुती वादातून कोर्टात स्टेनो म्हणून काम करणार्‍या पतीने कात्रीने गळ्यावर वार करुन पत्नीचा खून केल्याची घटना समोर आली आहे.

ज्योती शिवदास गीते (वय २८, रा. तुळजाभवानी नगर, खराडी) असे खुन झालेल्या पत्नीचे नाव आहे. चंदननगर पोलिसांनी शिवदास तुकाराम गीते (वय ३७, रा. तुळजाभवानी नगर, खराडी) याला अटक केली आहे. ही घटना त्यांच्या राहत्या घरी बुधवारी पहाटे साडेचार वाजता घडली.

पोलिसांनी दिलेल्या माहितीनुसार, शिवदास गीते हा मुळचा बीडचा राहणारा आहे. तो कोर्टात स्टेनो म्हणून नोकरी करतो. तुळजाभवानी नगर येथे तो भाड्याने रहात आहे. पतीपत्नीमध्ये घरगुती कारणावरुन भांडणे होत होती. आज पहाटे यांच्यात याच कारणावरुन भांडणे झाली. त्यात शिवदास याने घरातील कात्रीने ज्योती हिच्या गळ्यावर वार करुन खुन केला. या घटनेची माहिती मिळताच चंदननगर पोलीस तातडीने घटनास्थळी पोहचले़ त्यांनी शिवदास गीते याला ताब्यात घेतले असून ज्योती हिचा मृतदेह शवविच्छेदनासाठी ससून रुग्णालयात पाठविला आहे़.

वरिष्ठ पोलीस निरीक्षक संजय चव्हाण अधिक तपास करीत आहेत.