अंमली पदार्थाची विक्री करण्यासाठी आलेल्या दोघांना अंमली पदार्थ विरोधी पथकाकडून अटक

पुणे : अंमली पदार्थाची विक्री करण्यासाठी आलेल्या दोघांना अंमली पदार्थ विरोधी पथकाने पकडून त्यांच्याकडून ४ किलो ८०१ ग्रॅम गाजा हस्तगत केला आहे.

नितीन भाऊसाहेब गोपाळ (वय २०, रा. दत्त दिगंबर सोसायटी, साखरी रोड, धुळे), लकी छोटु पवार (वय १९, रा. लक्ष्मी नारायण कॉलनी, साखरी रोड, धुळे) अशी अटक केलेल्यांची नावे आहेत.

अंमली पदार्थ विरोधी पथक सिंहगड रोडवरील सिंहगड इन्स्टिट्युट ऑफ मॅनेजमेंट कॉलेज परिसरात पेट्रोलिंग करत होते. त्यावेळी गेटसमोर दोघे जण संशयस्पदरित्या थांबलेले आढळून आले. त्यांना पकडून त्यांची झडती घेतली. त्यांच्याकडे ९६ हजार २० रुपयांचा ४ किलो ८०१ ग्रॅम गांजा, २ मोबाईल असा १ लाख १६ हजार २० रुपयांचा माल आढळून आला. दोघेही मुळचे धुळे जिल्ह्यातील असून त्यांनी हा गांजा कोठून आणला याचा पोलीस तपास करीत आहेत.

ही कारवाई अपर पोलीस आयुक्त शैलेश बलकवडे, पोलीस उपायुक्त विवेक मासाळ, सहायक पोलीस आयुक्त गणेश इंगळे यांच्या मार्गदर्शनाखाली वरिष्ठ पोलीस निरीक्षक उल्हास कदम, सहायक पोलीस निरीक्षक अनिकेत पोटे, सिंहगड पोलीस ठाण्याकडील सहायक पोलीस निरीक्षक वैशाली भोसले, पोलीस अंमलदार संदिप शिर्के, ज्ञानेश्वर घोरपडे, सचिन माळवे, प्रविण उत्तेकर, संदेश काकडे, दत्ताराम जाधव, विनायक साळवे, उदमले, खुटवड यांनी केले आहे.