हैदराबाद ते पुणे प्रवासात महिलेवर अत्याचार, खाजगी ट्रॅव्हल्स चालक जेरबंद

पुणे: हैदराबाद ते पुणे स्टेशन या खाजगी बसमधून प्रवास करत असताना एका महिला प्रवासाचा विनयभंग करण्यात आला आहे. या बसच्या चालकानेच हा सर्व प्रकार केला. बंडगार्डन पोलीस ठाण्यात या प्रकरणी गुन्हा दाखल करण्यात आला आहे.

आरोपीला अटक करण्यात आली आहे. पीडित महिलेने या प्रकरणी तक्रार दिली. शेख असलम शेख अलीमउद्दीन (वय 27, रा. शरीफ नगर हैदराबाद तेलंगणा) असे अटक करण्यात आलेल्या आरोपीचे नाव आहे. बस प्रवासात हा प्रकार 23 सप्टेंबर रोजी घडला.

याप्रकरणी अधिक माहिती अशी की, हैदराबादच्या नामपल्ली येथून पीडित महिला पुणे येथे येण्यासाठी शह टूर्स अँड ट्रॅव्हल्स या खाजगी बसने निघाली होती. यावेळी बस प्रवासात असताना रात्री बारा ते एकच्या सुमारास आरोपी चालक पाठीमागे आला आणि पीडित महिलेजवळ येऊन डोके दाबण्याचा बहाणा केला. त्यानंतर फिर्यादीच्या शेजारी झोपून जबरदस्तीने तिच्यासोबत अतिप्रसंग करण्याचा प्रयत्न केला. या सर्व प्रकारानंतर फिर्यादी महिलेने सकाळी बस पुण्यात आल्यानंतर बंडगार्डन पोलीस ठाण्यात तक्रार दिली. पोलिसांनी याप्रकरणी गुन्हा दाखल करून आरोपीला अटक केली आहे.