दुकानात घुसून दुकानदारावर कोयत्याने वार

दापोडी: दापोडी येथे भरदिवसा दुकानात घुसून दुकानदारावर कोयत्याने वार करत दुकानातील पैसे हे जबरदस्तीने नेल्याची घटना घडली.

रियाज लियाकत अली (वय 26, रा.बोपोडी) यांनी फिर्याद दिली असून भोसरी पोलीस ठाण्यात सैफ रैन, शादाफ शेख व त्यांचे दोन साथीदार सर्व राहणार दापोडी यांच्यावर गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी हे त्यांच्या दुकानात बसले असता आरोपी तेथे आले. त्यांनी फिर्यादी यांना शिवीगाळ करत त्यांच्याकडे दारुसाठी पैसे मागितले. यावेळी फिर्यादी यांनी त्यांना नकार दिला असता, आरोपींनी फिर्यादीवर कोयत्याने वार केले. यात फिर्यादी जखमी झाले.

त्यांच्या खांद्यावर, दंडावर, मनगटावर वार करण्यात आले व दुकानातील 1 हजार 200 रुपये काढून घेतले. तसेच, हातात कोयते फिरवून जमा झालेल्या लोकांना इशारा करून आम्ही इथले भाई आहोत, कोणी पोलीसात तक्रार केली तर आम्हाला जो नडला त्याला कायमचा तोडला अशी धमकी देऊन परिसरात दहशत पसरवली. यावरून भोसरी पोलीस ठाण्यात गुन्हा दाखल केला असून पोलीस पुढिल तपास करत आहेत.