अल्पवयीन मुलीचा पाठलाग करत शिवीगाळ, अल्पवयीन मुलाविरोधात गुन्हा दाखल

दिघी: वर्ग मित्राने अल्पवयीन मुलीचा पाठलाग करत तसेच शिवीगाळ करत सोशल मीडियावर मुलींच्या नावाने अकाउंट सुरु करून बदनामी केली. हा प्रकार मागील चार महिन्यांपासून दिघी येथील एका इंग्रजी माध्यमाच्या शाळेत घडला.

याप्रकरणी पीडित अल्पवयीन मुलीने दिघी पोलीस ठाण्यात फिर्याद दिली आहे. त्यानुसार तिच्या वर्गातील अल्पवयीन मुलाविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, मुलाने फिर्यादीकडे प्रेमाची मागणी केली. फिर्यादीने त्यास नकार दिला असता मुलाने तिचा पाठलाग करून तिच्याशी बोलण्याचा प्रयत्न केला. फिर्यादी तरीही प्रतिसाद देत नसल्याने त्याने तिच्याकडे बघून शिवीगाळ करण्यास सुरुवात केली. त्यानंतर त्याने सोशल मीडियावर दोन मुलींच्या नावाने अकाउंट सुरु केले आणि त्यावरून फिर्यादीस शिवीगाळ करत बदनामी केली. दिघी पोलीस तपास करीत आहेत.