सासरच्यांकडून विवाहितेचा आर्थिक व मानसिक छळ, आरोपीविरुद्ध गुन्हा दाखल

भोसरी: सासरच्यांकडून आर्थिक व मानसिक छळ प्रकरणी दापोडी येथील विवाहितेने आपल्या पती, दिर व सासू यांच्या विरोधात भोसरी पोलीस ठाण्यात फिर्याद दिली आहे.

सासू वय 46 वर्ष, दिर – अजिंक्य कांबळे, वय 25 वर्षे, पती – अक्षय कांबळे, वय 28 वर्षे, सर्व रा. न्यू गुलाबनगर दापोडी, पुणे यांच्या विरोधात भा. द. वि कलम 498(अ), 323, 504, 507 अन्वये गुन्हा दाखल करण्यात आला आहे.

हा छळ 2016 पासून आतापर्यंत फिर्यादीच्या राहत्या घरी चालू होता. फिर्यादी यांची पती, सासू व दिर हे घरगुती कारणावरून शिवीगाळ करत असत. तसेच त्यांची सासू तुला मुलबाळ होत नाही, तु वांझोटी आहे, असे बोलून त्यांचा मानसिक छळ करून अपमानीत करत होते.

त्यानंतर फिर्यादीला लग्नामध्ये पतीने अंदाजे एक लाख रुपयांचे केलेले सोन्याचे दागिने त्यांना न विचारता चिंचवड येथे गहाण ठेवले असून त्यातील काही दागिने विकून पैसे घेऊन परस्पर खर्च केले आहेत. फिर्यादी यांना वारंवार शिवीगाळ मारहाण करून धमकी देऊन त्यांचा शारीरिक, मानसिक व आर्थिक छळ केला आहे.