कर्जाच्या बदल्यात सहापट रक्कम वसूल केल्यानंतर, जीवे मारण्याची धमकी देणारा खाजगी सावकार जेरबंद

सिंहगडः एक लाख रुपये कर्जाच्या बदल्यात सहा लाख रुपये वसूल केल्यानंतर आणखी अडीच लाखाच्या मागणीसाठी ठार मारण्याची धमकी देणाऱ्या खाजगी सावकाराला पोलिसांनी अटक केली आहे.

सिंहगड पोलीस ठाण्यात याप्रकरणी गुन्हा दाखल करण्यात आला आहे. नागराज उर्फ नागेश रत्नाकर नायकोडी (वय 24, शनी नगर जांभूळवाडी रोड पुणे) असे अटक करण्यात आलेल्या खाजगी सावकाराचे नाव आहे. याप्रकरणी विपुल अरविंद सोलंकी (वय 35) यांनी तक्रार दिली आहे.

पोलिसांनी दिलेल्या माहितीनुसार, फिर्यादी आणि आरोपी एकमेकांच्या ओळखीचे आहेत. फिर्यादीने 2020 मध्ये आरोपीकडून 15 टक्के व्याजदराने एक लाख रुपये घेतले होते. त्याच्या बदल्यात आतापर्यंत ऑनलाईन आणि फोन पे द्वारे 5 लाख 95 हजार रुपये पाठवले. त्यानंतर ही आरोपीने फिर्यादीच्या घरात बळजबरीने घुसून अजून अडीच लाख रुपयांची मागणी केली. हे पैसे दिले नाही तर ठार मारण्याची धमकी दिली. पोलिसांनी याप्रकरणी गुन्हा दाखल करून आरोपीला अटक केली आहे. अधिक तपास सहाय्यक पोलीस निरीक्षक यादव करत आहेत.