मूलबाळ होत नसल्याने विवाहितेचा छळ, कंटाळून केली आत्महत्या

पुणे: पुण्यातील रेंज हिल परिसरात सासरच्या छास कंटाळून एका पस्तीस वर्षीय विवाहितेने गळफास घेऊन आत्महत्या केली. उमा सचिन कुंभार (वय 35) असे आत्महत्या केलेल्या महिलेचे नाव आहे.

याप्रकरणी तिचा पती सचिन कुंभार, सासरे पंढरी कुंभार, सासू सखुबाई कुंभार यांच्यासह सहा जणांवर गुन्हा दाखल करण्यात आला आहे. निलेश प्रभाकर सोनवणे (वय 33) यांनी याप्रकरणी तक्रार दिली आहे.

पोलिसांनी दिलेल्या माहितीनुसार, 2019 मध्ये उमा आणि सचिन कुमार यांचे लग्न झाले होते. लग्न झाल्यानंतर आरोपींनी उमा कुंभार यांना घराच्या बाहेर जाऊ न देता शेजाऱ्यांसोबत बोलण्यास देखील मनाई केली होती. तसेच जेवण व्यवस्थित करता येत नाही म्हणून आरोपी पतीने वेळोवेळी भांडण करून घराच्या बाहेर काढले होते.

तर इतर आरोपींनी मूलबाळ होत नसल्याने होणाऱ्या वादाला उमाला जबाबदार धरून तिचा मानसिक आणि शारीरिक छळ केला होता. अखेरीस हा सर्व त्रास असह्य झाल्याने उमा कुंभार यांनी राहत्या घरी आत्महत्या केली. खडकी पोलिसांनी याप्रकरणी गुन्हा दाखल केला असून अधिक तपास सुरू आहे.