चारित्र्यावर संशय घेत पत्नीला मारहाण, पोलीस कर्मचाऱ्यावर गुन्हा दाखल

पुणे: पुणे पोलीस दलात नेमणूक असलेला एका पोलीस कर्मचारी विरोधात गुन्हा दाखल करण्यात आला आहे. चारित्र्यावर संशय घेत पत्नीला मारहाण केल्याप्रकरणी हा गुन्हा दाखल करण्यात आला आहे. या पोलीस कर्मचाऱ्यांच्या पत्नीने भारती विद्यापीठ पोलीस ठाण्यात तक्रार दिली आहे.

दिनकर बबन हनमघर (वय 45) असे गुन्हा दाखल करण्यात आलेल्या पोलीस शिपायाचे नाव आहे. मार्केट यार्ड पोलीस ठाण्यात ते नेमणुकीस आहेत. याप्रकरणी त्यांच्या 39 वर्षीय पत्नीने तक्रार दिली आहे.

पोलिसांनी दिलेल्या माहितीनुसार, फिर्यादी आणि आरोपी यांचे 2010 साली लग्न झाले आहे. लग्न झाल्यापासून ते आजतागायत आरोपीने पत्नीला तू मला आवडत नाही असे म्हणून तिचा छळ केला. तिच्या चारित्र्यावर संशय घेऊन पैसे चोरल्याचा आरोप करून वेळोवेळी शिवीगाळ करत मारहाण केली. फिर्यादीचा शारीरिक आणि मानसिक छळ करत फिर्यादीच्या मुलाला देखील मारहाण केली असल्याचे तक्रारीत म्हटले आहे. पोलिसांनी याप्रकरणी गुन्हा दाखल केला असून अधिक तपास सुरू आहे.