नातेवाईकाकडून तरुणीवर लैंगिक अत्याचार, आरोपी अटक

चिखली: घरात कोणीही नसल्याचा गैरफायदा घेत तरुणाने नातेवाईक महिलेवर लैंगिक अत्याचार केला. घडलेला प्रकार कोणास सांगितल्यास तरुणीला जीवे मारण्याची धमकी दिली. हा प्रकार जाधववाडी चिखली येथे घडला.

याप्रकरणी १९ वर्षीय पीडित महिलेने चिखली पोलीस ठाण्यात फिर्याद दिली आहे. त्यानुसार फिर्यादीच्या नातेवाईक तरुणाला पोलिसांनी अटक केली आहे.

पोलिसांनी दिलेल्या माहितीनुसार, फिर्यादी महिलेचे पती, दीर, सासू हे शनिवारी सकाळी कामावर गेले. त्यानंतर फिर्यादी महिला आणि त्यांची जाऊ अशा दोघी घरी होत्या. फिर्यादीची जाऊ देखील बाहेर गेल्यानंतर फिर्यादी घरात एकटी असल्याचा गैरफायदा घेऊन नातेवाईक तरुणाने फिर्यादीवर लैंगिक अत्याचार केला. फिर्यादीने त्यास विरोध केला असता घडलेला प्रकार कोणास सांगितला तर फिर्यादीला जीवे मारण्याची धमकी दिली असल्याचे फिर्यादीत म्हटले आहे. चिखली पोलीस तपास करीत आहेत.