पुणे कॅम्प परिसरात कोयता गँगची दहशत

कॅन्टोन्मेंट : तोंडाला रुमाल, डोक्यात टोपी घालून दुचाकी आलेल्या पाचजणांनी कोयता, रॉड घेऊन हॉटेलमालकाला शिवीगाळ करीत जीवे मारण्याची धमकी दिली. तुमची हिंदुंची हॉटेल चालविण्याची लायकी आहे का, असे म्हणत हॉटेलची तोडफोड करणाऱ्यावर लष्कर पोलीस स्टेशनमध्ये गुन्हा दाखल करण्यात आला आहे.
हा प्रकार भवानी पेठेतील निशा हॉटेलमध्ये गुरुवारी (दि. ५ जानेवारी, २०२३) दुपारी साडेतीनच्या सुमारास घडली. ही घटना सीसीटीव्हीमध्ये कैद झाली आहे. याप्रकरणी मोनिश शशिकांत म्हेत्रे (वय ३९, रा. ३८८, भवानी पेठ, पुणे) यांनी लष्कर पोलीस स्टेशनमध्ये फिर्याद दिली आहे.

पोलिसांनी सांगितले की, फिर्यादीला पाच अज्ञातांनी भवानी पेठेतील निशा हॉटेलमध्ये घुसून तोडफोड केली, त्यानंतर कोयता, लोखंडी ऱॉडचा धाक दाखवून जीवे मारण्याची धमकी दिली. पोलीस उपनिरीक्षक महेंद्र कांबळे पुढील तपास करीत आहेत.हॉटेलचे मालक शैलेश म्हेत्रे हे भाजपचे कार्यकर्ते आहे. म्हेत्रे म्हणाले की, निवडणुका जवळ येत आहे. माझ्या विरोधकांनी हा कट रचून हा प्रकार केला असल्याची माहिती त्यांनी दिली.