ऑनलाईन मैत्री करणं पडलं महागात; महिलेकडून तरुणाला लाखोंचा गंडा

फेसबुकवर अनोळखी महिलेशी मैत्री करणं मुंबईतील नोकरदार तरुणाला चांगलंच महागात पडलं आहे. कारण आता आरोपी महिलेनं तरुणाला ३.५ लाख रुपयांना गंडा घातल्याचा धक्कादायक प्रकार समोर आला असून त्यामुळं मुंबईतील चेंबूरमध्ये खळबळ उडाली आहे. या प्रकरणात पीडित तरुणानं तक्रार दाखल केली असून पोलिसांनी दोन आरोपींविरोधात गुन्हा दाखल केला आहे. पोलिसांनी आरोपींना अटक करण्याची कार्यवाही सुरू केली असून या प्रकरणात मुंबईत तरुणांची फसवणूक करणारं रॅकेट सक्रीय असल्याचाही संशय व्यक्त केला जात आहे.

मिळालेल्या माहितीनुसार, नवी मुंबईलगत असलेल्या ऐरोलीतील एका खासगी कंपनीत काम करणाऱ्या तरुणाला गेल्या महिन्यात कीर्ती अग्रवाल नावाच्या महिलेची फेसबुकवर फ्रेंड रिक्वेस्ट आली होती. त्यानं रिक्वेस्ट स्वीकारल्यानंतर दोघांमध्ये चॅटिंग सुरू झाली. एकमेकांनी व्हॉट्सअॅपचा नंबरही शेयर केला. तरुणानं महिलेशी काही दिवस फोनवर बोलणं देखील केलं. परंतु ३१ डिसेंबरला नववर्षाच्या निमित्तानं आनंदोत्सव साजरा करत असताना तरुणाला आरोपी महिलेनं फोन करून बाथरुममध्ये जाण्याची विनंती केली. त्यानंतर बाथरुममध्ये जाण्याची विनंती केली. तरुण बाथरुममध्ये गेल्यानंतर त्यानं कपडे काढले. त्यावेळी त्याला व्हिडिओ कॉलवर विवस्त्र महिलेचा व्हिडिओ दिसला. काही सेकंदांनंतर कॉल डिस्कनेक्ट झाला आणि त्यानंतर आरोपी महिलेनं तरुणाला फोन करून कॉल रेकॉर्डिंग सोशल मीडियावर व्हायरल करण्याची धमकी दिली. याशिवाय पहिल्यावेळी १५ हजार रुपयांची मागणी केली. त्यानंतर आरोपींना फोटो व्हायरल होण्याच्या भीतीनं पैसे दिल्याचंही तरुणानं तक्रारीत म्हटलं आहे.