सिगारेट दिली नाही या कारणावरुन कोयत्याचा धाक दाखवून धमकावले

सिगारेट दिली नाही या कारणावरुन मोटारसायकलवरुन आलेल्या ११ जणांनी सिंहगड -पानशेत रोडवरील गोर्‍हे गावात धुडगुस घातला. हवेत कोयते फिरवून येणार्‍या जाणार्‍याला धमकावून जीवे मारण्याची धमकी दिल्याचा प्रकार रविवारी सायंकाळी घडला.

याप्रकरणी एका महिला दुकानदाराने हवेली पोलीस ठाण्यात फिर्याद दिली आहे. त्यानुसार पोलिसांनी नचिकेत संजय जगताप, सुरज लगींदर ठाकूर, यश संजय जगताप, अक्षय चव्हाण ऊर्फ चपाती मोन्या, अनुप शेलार, निलेश सहा, सागर कांतू पाटील, अक्षय पारगे, अनिकेत मोरे, करण शिंदे, पंकज दिलीप चव्हाण (सर्व रा. गोर्‍हे बुद्रुक) यांच्याविरुद्ध गुन्हा दाखल करण्यात आला आहे.

माहितीनुसार फिर्यादी या त्यांच्या दुकानात असताना टोळके मोटारसायकलवरुन आले. त्यांनी फिर्यादीकडे सिगारेट मागितली. दुकानात सिगारेट नसल्याचे त्यांनी सांगितले. त्यानंतर ते मोटारसायकल जोरात रेस करुन चालवू लागले. त्यांच्या शेजारील एका आजीला ते कट मारुन जाऊ लागले. पुढे जाऊन पुन्हा गाडी वळवली. तेव्हा फिर्यादी यांच्या शेजारी राहणार्‍यांनी मुले खेळत आहेत, मोटार सायकल हळू चालवा, असे यश जगताप याला सांगितले. तेव्हा या टोळक्याने त्यांना शिवीगाळ करून दमदाटी करुन मारहाण करण्यासाठी त्यांचे अंगावर धावून जाऊ लागले. तेव्हा फिर्यादीमध्ये पडल्याने यश जगताप यांनी त्यांना ढकलून दिल्याने त्या रोडवर खाली पडल्या. जमलेल्या लोकांनी त्यांना निघून जाण्यास सांगितले.

तेव्हा ते निघून गेले. मात्र, पाच मिनिटांनी सर्व जण पुन्हा आले.
गोरखचे सलूनजवळ मोटार सायकली उभ्या करुन व येणार्‍या जाणार्‍या लोकांना शिवीगाळ -दमदाटी करुन हातातील कोयता दाखवुन दहशत पसरु लागले.