4 लाख 82 हजार रुपये आणि अमेरिकन डॉलर्स ची बॅग चोरीला

बाणेर: पुण्यातील बाणेर परिसरात एका क्लिनिकमधून अमेरिकन डॉलर्स आणि रोख रक्कम असलेली 4 लाख 82 हजार रुपयांची बॅग चोरीला गेल्याची घटना समोर आली आहे.

याप्रकरणी क्लिनिकचे मालक रितेश शहा यांनी चतु:श्रृंगी पोलिस ठाण्यात फिर्याद दिली आहे. पोलिसांनी दिलेल्या माहितीनुसार, शाह यांचे बाणेर येथील ऑर्किड शाळेजवळ श्रद्धा पॉलीक्लिनिक आहे.

ही घटना घडली तेव्हा शाह रुग्णालयात होते. त्यावेळी पैसे असलेली बॅग त्यांच्याकडे होती. मात्र, बॅग गायब असल्याचे त्यांच्या लक्षात आले आणि त्यांनी तत्काळ पोलिसांकडे तक्रार दाखल केली. याप्रकरणी गुन्हा दाखल करण्यात आला असून पोलीस हवालदार अशोक वनवे पुढील तपास करत आहेत.