हवेत गोळीबार करून वाईन शॉप लुटण्याचा प्रयत्न

सिंहगड: पुण्यातील सिंहगड रस्ता परिसरातील नऱ्हे येथे वाईन शॉप मालकाच्या हातातून पैशाची बॅग हिसकावून घेण्याचा प्रकार दोघांनी केलाय. मात्र नागरिक आणि दुकानातील कामगार जमा झाल्याने लुटारूंनी हवेत गोळीबार करून पळ काढला. नऱ्हे परिसरातील हिरो वाईन्स जवळ ही घटना घडली.

याप्रकरणी तुकाराम सोपान इंगळे (वय 57) यांनी फिर्याद दिली असून त्यानुसार दोन अनोळखी आरोपीविरोधात सिंहगड रस्ता पोलीस ठाण्यात गुन्हा दाखल करण्यात आला आहे.

याप्रकरणी अधिक माहिती अशी की फिर्यादी तुकाराम इंगळे यांच्या मालकीचे हिरो वाईन शॉप आहे. रविवारी रात्री वाईन शॉप बंद करून घरी जाण्याच्या प्रयत्नात असलेल्या तुकाराम इंगळे यांच्या दिशेने दोघेजण आले. त्यांनी तुकाराम इंगळे यांच्याजवळ येऊन त्यांना पिस्तुलाचा धाक दाखवला. इंगळे यांच्या जवळ असलेली पैशाची बॅग हिसकावण्याचा त्यांनी प्रयत्न केला. मात्र इंगळे यांनी विरोध करत बॅग घट्ट धरून ठेवली त्यामुळे चोरट्यांना बॅग पळवता आली नाही.

त्यानंतर दुकानातील कामगारांनी नागरिक घटनास्थळी जमा झाल्याचे पाहून तरुणांनी पिस्तूल हवेच्या दिशेने रोखून गोळीबार केला आणि त्यानंतर ते महाराष्ट्र बँकेच्या दिशेने पसार झाले. सिंहगड रस्ता पोलिसांनी या प्रकरणी गुन्हा दाखल केला असून अधिक तपास सुरू आहे.