प्रेमविवाह केला म्हणून तरुणीच्या कुटुंबियांकडून तरुणाच्या कुटुंबियांना मारहाण

थेरगाव: पळून जाऊन प्रेमविवाह केलेल्या तरुणीच्या कुटुंबीयांनी तरुणाच्या कुटुंबियांना मारहाण केली. तसेच बघून घेण्याची धमकी दिली. ही घटना थेरगाव येथे घडली.

संभाजी शेलार (वय 51), रामचंद्र शेलार (वय 47), तीन महिला अशी गुन्हा दाखल झालेल्यांची नावे आहेत. याप्रकरणी महिलेने वाकड पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, फिर्यादी आणि त्यांचे पती कामावरून घरी आले असता फिर्यादी यांचा मुलगा आणि आरोपींची मुलगी हे लग्न करून कोठेतरी निघून गेले .या कारणावरून आरोपी फिर्यादी यांच्या घरी आले. आमची मुलगी कोठे आहे, अशी फिर्यादीकडे विचारणा केली. त्यावर आपल्याला काहीही माहिती नसल्याचे फिर्यादी यांनी सांगितले. त्यावरून आरोपींनी फिर्यादी, त्यांचे पती आणि सासूला मारहाण केली. माझी मुलगी मिळाली नाही तर तुला व तुझ्या पतीला बघून घेतो, अशी आरोपींनी फिर्यादी यांना धमकी दिली असल्याचे फिर्यादीत म्हटले आहे. पुढील तपास वाकड पोलीस करीत आहेत.