बलात्काराच्या गुन्ह्यातील एक आरोपी पोलिसांना हिसका देवून पसार

पुणे : बलात्काराच्या गुन्ह्यातील एका आरोपीने पोलिसांना हिसका देवून पलायन केल्याची घटना हडपसर पोलिस ठाण्याच्या मगरपट्टा पोलिस चौकीत सोमवारी सायंकाळी घडली. या घटनेने शहर पोलिस दलात खळबळ उडाली आहे.
प्रीतम चंदुलाल ओसवाल (वय ३२, रा. उरुळी देवाची, ता. हवेली) असे त्या आरोपीचे नाव आहे. सहायक पोलिस आयुक्त संजय पाटील यांनी दिलेल्या माहितीनुसार, प्रीतम ओसवाल याच्याविरुद्ध हडपसर पोलिस ठाण्यात बलात्काराचा गुन्हा दाखल आहे. पोलिसांनी ओसवाल याला ३१ ऑगस्ट रोजी अटक केली होती.तो सध्या पोलिस कोठडीत होता. पोलिसांनी त्याला गुन्ह्याच्या तपासासाठी आज सायंकाळी साडेसात वाजता मगरपट्टा पोलिस चौकीत नेले होते. त्यावेळी पोलिस कर्मचाऱ्यांना हिसका देवून तो पसार झाला. हडपसर पोलिस आरोपीचा शोध घेत आहेत