पुण्यातील कंपनीची 35 लाखांची फसवणूक नाशिक येथील दोघांवर लोणी काळभोर पोलीस ठाण्यात गुन्हा दाखल

पुणे : वेगवेगळ्या ठिकाणी स्पेअरपार्टची दुकाने असल्याचे सांगून पुण्यातील कंपनीकडून 35 लाखांचा माल खरेदी केला. मात्र, खरेदी केलेल्या मालाचे पैसे न देता आर्थिक फसवणूक केल्याप्रकरणी नाशिक येथील दोघांवर लोणी काळभोर पोलीस ठाण्यात गुन्हा दाखल केला आहे
प्रविण बजाज व अतुल लांजेवार (दोघे रा. नाशिक) यांच्यावर गुन्हा दाखल केला आहे. याबाबत सोमाणी पियोजीओ स्पेअरपार्ट एजन्सी कंपनीचे कर्मचारी संदीप भिमराव घुले (वय-36 रा. मांजरी, ता. हवेली) यांनी लोणी काळभोर पोलीस ठाण्यात फिर्याद दिली आहे. हा प्रकार 11 फेब्रुवारी 2023 ते 30 एप्रिल 2023 या कालावधीत कंपनीच्या वडकी येथील गोडावुन मध्ये घडला आहे.

पोलिसांनी दिलेल्या माहितीनुसार, आरोपींनी नाशिक, भुसावळ, तळोदा, मनमाड या ठिकाणी वेगवेगळ्या नावाची स्पेअरपार्टसची दुकाने असल्याचे सांगितले. दुकानांच्या नावाने फिर्यादी यांच्या कंपनीला मालाची ऑर्डर देऊन माल ताब्यात घेतला. मात्र, मालाचे पैसे न देता आरोपींनी संगनमत करुन फिर्यादी यांच्या कंपनीची 34 लाख 65 हजार 289 रुपयांची फसवणूक केली. तसेच विश्वासाने दिलेल्या मालाचा अपहार केला. पुढील तपास पोलीस करीत आहेत