विक्रीसाठी गांजा बाळगणाऱ्या एकाला अटक 7 लाख 58 हजार 800 रुपयांचा मुद्देमाल जप्त

पिंपरी :विक्रीसाठी गांजा बाळगणाऱ्या एकाला पिंपरी चिंचवड पोलिसांच्या गुन्हे शाखेच्या अंमली पदार्थ विरोधी पथकातील पोलिसांनी अटक केली आहे. त्याच्याकडून साडेसात लाखांचा मुद्देमाल जप्त केला आहे. ही कारवाई वल्लभनगर येथील गोलमंडई येथे बुधवारी रात्री आठच्या सुमारास करण्यात आली

जितेंद्र मगन कोळी (वय-33 रा. इसाळ, ता. शिरपुर जि. धुळे) असे अटक केलेल्या आरोपीचे नाव आहे. याप्रकरणी पोलीस शिपाई कपिलेश कृष्णा इगवे (वय-33) यांनी पिंपरी पोलीस ठाण्यात फिर्य़ाद दिली आहे. पोलिसांनी आरोपीवर एनडीपीएस अॅक्ट नुसार गुन्हा दाखल केला आहे.

पोलिसांनी दिलेल्या माहितीनुसार, जितेंद्र कोळी हा संत तुकाराम नगर येथील मुख्य अग्निशमन केंद्रासमोर थांबला होता.
त्याच्याजवळ गांजा असल्याची माहिती अमली पदार्थ विरोधी पथकाला मिळाली. त्यानुसार पथकाने कोळी याला
ताब्यात घेतले. त्याची अंगझडती घेतली असता त्याच्याकडून 7 लाख 43 हजार 800 रुपयांचा 7 किलो 438 ग्रॅम
वजनाचा गांजा व 15 हजार रुपये किंमतीचा मोबाईल असा एकूण 7 लाख 58 हजार 800 रुपयांचा मुद्देमाल जप्त केला आहे. त्याच्याकडे केलेल्या तपासात गांजा विक्रीसाठी आणल्याचे उघडकीस आले आहे. पुढील तपास सहायक पोलीस निरीक्षक अनिरुद्ध सावर्डे करीत आहेत.