उधारीवर सिगारेट न दिल्याने चार जणांनी टपरी चालकाला काठीने व दगडाने मारहाण

पुणे : उधारीवर सिगारेट देण्यास नकार दिल्याने चार जणांनी टपरी चालकाला काठीने व दगडाने मारहाण करुन गंभीर जखमी केले. याप्रकरणी हडपसर पोलिसांनी चार जणांवर गुन्हा दाखल करुन दोघांना अटक केली आहे. हा प्रकार शुक्रवारी (दि.16) रात्री साडेनऊ ते दहाच्या सुमारास हडपसर परिसरातील शिंदे वस्ती येथील पावर हाऊस समोर घडला आहे

याबाबत वसीम युनुस मुजावर (वय-24 रा. शिंदे वस्ती, हडपसर) याने हडपसर पोलीस ठाण्यात फिर्याद दिली आहे. यावरुन दिवेश चव्हाण, शेखर यादव, राहुल चव्हाण, यश चव्हाण (सर्व रा. गोसावी वस्ती, हडपसर) यांच्यावर आयपीसी 324, 323, 504, 506, 34 नुसार गुन्हा दाखल करुन राहुल चव्हाण व यश चव्हाण यांना अटक केली आहे.

पोलिसांनी दिलेल्या माहितीनुसार, फिर्यादी व त्यांचा भाऊ यांची हडपसर येतील शिंदे वस्ती येथील पावर हाऊस समोर पानटपरी आहे. शुक्रवारी रात्री साडेनऊ च्या सुमारास आरोपी पानटपरीवर आले. त्यांनी उधारीवर सिगारेट मागितली. मात्र फिर्यादी यांनी उधारीवर सिगारेट देण्यास नकार दिला. याचा राग आल्याने आरोपींनी फिर्यादी यांना शिवीगाळ करुन हाताने मारहाण केली. तसेच बघुन घेण्याची धमकी दिली.

तसेच फिर्यादी यांना अंधारात डोक्यात दगड व काठीने मारहाण करुन गंभीर जखमी केली. याबाबत वसीम याने फिर्याद दिल्यानंतर पोलिसांनी दोघांना अटक केली. पुढील तपास सहायक पोलीस निरीक्षक दिपक बर्गे करीत आहेत.