वाघोली येथे बहिणीच्या प्रियकरावर असलेल्या रागामधून स्कूल व्हॅन चालक तरूणावर कोयत्याने हल्ला

पुणे : बहिणीच्या प्रियकरावर असलेल्या रागामधून एका अल्पवयीन मुलासह त्याच्या साथीदाराने स्कूल व्हॅन चालक तरूणावर कोयत्याने हल्ला केल्याची घटना वाघोली येथे घडली. विशेष म्हणजे हल्ला झाला त्यावेळी हा तरुण शाळेच्या मुलांना स्कूल व्हॅनमधून घेऊन जात होता. गाडीमध्ये शाळेची मुले असताना देखील हल्लेखोरांनी गाडीच्या काचांवर आणि दरवाजावर
कोयत्याने घाव घालत हल्ला चढवला. भेदरलेल्या शाळेच्या मुलांनी जिवाच्या आकांताने आरडाओरडा सुरू केल्यानंतर आरोपी पसार झाले. सुदैवाने या घटनेत शाळेचे विद्यार्थी जखमी झाले नाहीत.
सचिन दिगंबर इंगवले (वय २७, गल्ली नंबर ०३, काळबाईनगर, वाघोली) यांनी फिर्याद दिली आहे. लोणीकंद पोलिसांनी १७ वर्षीय अल्पवयीन मुलासह त्याच्या साथीदारावर गुन्हा दाखल केला आहे. लोणीकंद पोलिसांनी दिलेल्या माहितीनुसार, फिर्यादी सचिन हे त्यांची आई, पत्नी, लहान भाऊ आणि मुलासह राहण्यास आहेत. त्यांच्याकडे स्कूल व्हॅन असून ते वाघोली येथील बीजेएस कॉलेज या संस्थेच्या शाळेतील मुलांना शाळेत नेण्या-आणण्याचे काम करतात. त्यांच्या गाडीवर सहा वर्षांपूर्वी फिर्यादीच्या आत्याचा मुलगा मोहन राजाभाऊ कदम (रा. शिरसाळा, ता. परळी, बीड)
हा चालक म्हणून काम करीत होता. तो वाघोली मधील दुबेनगर येथील एका मुलीला आणि तिच्या भावाला २०१९-२०२० मध्ये बीजेएस कॉलेज या संस्थेच्या शाळेत नेण्या-आणण्याचे काम करीत होता. त्यावेळी मोहन व त्या मुलीमध्ये प्रेमप्रकरणावरून वाद झाले होते. त्यानंतर, पिडीत मुलीने याबाबत मोहन विरोधात लोणीकंद पोलीस ठाण्यात अपहरण आणि बलात्काराचा
गुन्हा दाखल केला होता.