पुण्यात रामटेकडी परिसरात अल्पवयीन मुलावर कोयत्याने वार करून खून

पुणे : कॉलेजला जात असताना अल्पवयीन मुलावर पूर्ववैमनस्यातून कोयत्याने सपासप वार करून निघृण खून केल्याची घटना घडली. ही घटना रामटेकडी जामा मशिदीसमोर सकाळी सात वाजण्याच्या सुमारास घडली. रक्ताच्या थारोळ्यात पडलेल्या मुलाला तत्काळ रुग्णालयात दाखल करण्यात आले. मात्र, उपचारापूर्वीच त्याचा मृत्यू झाल्याचे डॉक्टरांनी सांगितले. या गी प्रकरणी वानवडी पोलिस ठाण्यात दोन आरोपीविरोधात खुनाचा गुन्हा दाखल करण्यात आला आहे.

१७ वर्षीय मृत्युमुखी पडलेला अल्पवयीन मुलगा रामटेकडी इथे राहणारा आहे. तर दोन्ही आरोपी १८ वर्षाचे असून तेसुद्धा रामटेकडी, हडपसर परिसरात राहतात. मृत मुलाचा भाऊ स्वप्नील घाटे (वय २०) यांनी तक्रार दिली आहे. वानवडी पोलिस ठाण्याचे वरिष्ठ पोलिस निरीक्षक संजय पतंगे यांनी वानवडी पोलिस ठाण्याचे वरिष्ठ पोलिस निरीक्षक संजय पतंगे यांनी सांगितले, की मृत मुलाचे आणि आरोपीचे पूर्वीचे भांडण होते. या वादातून दोन्ही आरोपींनी बारावीत शिकणाऱ्या यश घाटेचा खून केला आहे. वानवडी पोलिसांनी तत्काळ दोन्ही आरोपींना अटक केली आहे.
रामनगर येथील जामा मशिदीसमोर त्याचे मित्र आदित्य चव्हाण, रेहान पठाण, श्रेयस शिंदे आले. साहिल शेख आणि ताहीर पठाण यांनी तेथे येऊन यशवर कोयत्याने वार केले. रक्ताच्या थारोळ्यात यश रस्त्यावर पडल्याने मित्रांनी आणि इतर नागरिकांनी आरडाओरडा करून त्याला तत्काळ रुग्णालयात दाखल केले. मात्र, उपचारांपूर्वीच मुलाचा मृत्यू झाल्याचे डॉक्टरांनी सांगितले. घटनास्थळी पोलिसांनी धाव घेऊन दोन आरोपीविरोधात खुनाचा गुन्हा दाखल केला आहे. आरोपींना अटक करण्यात आली आहे. मृत्यूमुखी पडलेला मुलगा बारावीत शिकत होता.