कीरकोळ वादात पत्नीच्या आतेभावाला टेकडीवरून ढकलले, आरोपीविरुद्ध गुन्हा दाखल

पुणे: वाद सोडविण्यासाठी आलेल्या पत्नीच्या आतेभावाला कात्रज टेकडीवर नेऊन जबर मारहाण करण्यात आली. यानंतर त्याला खाणीमध्ये ढकलून देण्यात आले. ही घटना रविवारी दुपारी घडली. या प्रकरणी आंबेगाव पोलीस ठाण्यात पतीविरुद्ध खुनाच्या प्रयत्नाचा गुन्हा दाखल करण्यात आला आहे.

अजय अनिल पाचवणे (२१, रा. साठे चौक, लोहगाव) यानी दिलेल्या तक्रारीनुसार शेखर कांबळे, लखन कांबळे आणि अमोल यांच्याविरुद्ध गुन्हा दाखल करण्यात आला आहे. त्यांचा शोध आंबेगाव पोलीस घेत आहेत.

पोलिसांनी दिलेल्या माहितीनुसार, संबंधित महिलेचा पती शेखर हा सतत तिच्याशी वाद घालून मारहाण करत आहे. त्यामुळे आपल्याला आईकडे सोडावे, असे महिलने आतेभाऊ अजय याला सांगितले.

त्यानुसार अजय तिच्या घरी गेला. तेथे शेखरने अगोदरच मित्रांना बोलावले होते. त्यांनी अजयला मारहाण करत कात्रज टेकडीवर नेले. तेथे बांबू आणि दगडाने मारहाण करुन दात पाडून हात फ्रॅक्चर केला. अजय तेथून पळून जात असताना त्याला धक्का दिल्याने तो खाणीत पडला.

त्यामुळे त्याचा मणका आणि दोन्ही हात फ्रॅक्चर झाले. या प्रकरणाचा तपास वरिष्ठ पोलीस निरीक्षक शरद झिने यांच्या मार्गदर्शनाखाली महिला पोलीस उपनिरीक्षक कोळी करत आहेत.