खुन केल्याने आरोपीच्या घरात घुसून केली तोडफोड; वाघोलीतील गोरेवस्तीतील घटना

वाघोली (पुणे): मुलीशी पूर्वी बोलत असल्याचा राग मनात ठेवुन मुलीचे भाऊ व वडिलांनी मारहाण केल्याने गणेश धांडे याचा मृत्यु झाला होता. त्यामुळे चिडलेल्या धांडे यांच्या नातेवाईकांनी पेटकर यांच्या घरात शिरुन साहित्याची तोडफोड केली.

ही घटना वाघोलीतील वाघेश्वरनगरमधील गोरेवस्तीत २ जानेवारी रोजी दुपारी अडीच वाजता घडली.

याबाबत मनिषा सुधीर पेटकर (वय ३०, रा. वाघेश्वरनगर, वाघोली) यांनी वाघोली पोलीस ठाण्यात फिर्याद दिली आहे. त्यावरुन पोलिसांनी छाया वाघु धांडे, विमलबाई पवार, सुलोचना पवार, छाया धांडे यांची मुलगी व सुन यांच्यासह इतर ७ ते ८ जणांवर गुन्हा दाखल करण्यात आला आहे.

पोलिसांनी दिलेल्या माहितीनुसार, मुलीशी बोलण्याच्या कारणावरुन गणेश वाघु धांडे (वय १७) याचा खुन करण्यात आला होता. याप्रकरणी वाघोली पोलिसांनी नितीन पेटकर, सुधीर पेटकर आणि लक्ष्मण पेटकर यांना अटक केली आहे. या खुनाचा राग मनात धरुन धांडे कुटुंबातील लोक पेटकर यांच्या घरी गेले. त्यांनी पेटकर यांच्या घराच्या दरवाजावर दगडाने मारले. दरवाजाची मोडतोड करुन अंगणातील मोटारसायकलवर दगडे मारुन मोडतोड केली. घरामध्ये प्रवेश करुन घरातील साहित्याची तोडफोड करुन नुकसान केले.

सहायक पोलीस निरीक्षक विनायक अहिरे तपास करीत आहेत.