तोल जाऊन पडल्याने रंगकाम करणाऱ्या कामगाराचा मृत्यू, ठेकेदाराविरुद्ध गु्न्हा दाखल

चंदननगर: रंगकाम करणाऱ्या कामगार शिडीवरुन तोल जाऊन पडल्याने त्याचा मृत्यू झाल्याची घटना वडगाव शेरी भागातील घटना घडली. सुरक्षाविषयक उपायोजना न करता कामगाराच्या मृत्यूस जबाबदार ठरल्याप्रकरणी ठेकेदाराविरुद्ध चंदननगर पाेलिसांनी गुन्हा दाखल केला.

अमरनाथ भागीरथी भारती (वय ५४, रा. उत्तमनगर) असे मृत्युमुखी पडलेल्या कामगाराचे नाव आहे. याप्रकरणी ठेकेदाराविरुद्ध गु्न्हा दाखल करण्यात आला आहे. याबाबत पोलीस शिपाई महेश भोंगळे यांनी चंदननगर पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, वडगाव शेरीतील परफेक्ट बाऊंटीफोर इमारतीच्या रंगरंगोटीचे काम सुरू आहे. तेथे अमरनाथ हे रंगकाम करत होते. गुरुवारी (९ जानेवारी) इमारतीत काम करताना शिडीवरुन तोल जाऊन पडल्याने अमरनाथ यांच्या डोक्याला गंभीर दुखापत झाली. गंभीर जखमी झालेल्या अमरनाथ यांचा उपचारादरम्यान मृत्यू झाला. सुरक्षाविषयक उपाययोजना न केल्याने ही दुर्घटना घडली. याप्रकणी ठेकेदाराविरुद्ध गुन्हा दाखल करण्यात आला. चंदननगर पोलिसांकडून याप्रकरणाचा तपास करण्यात येत आहे.