कोंढवा येवलेवाडी परिसरात अतिक्रमण व अनधिकृत बांधकाम विरोधात धडक कारवाई

पुणे: पुणे शहरातील कोंढवा येवलेवाडी कार्यालया अंतर्गत बांधकाम विभाग, अतिक्रमण विभाग, आकाशचिन्ह व परवाना विभाग व आरोग्य विभाग यांची संयुक्त कारवाई केली आहे.

महापालिका आयुक्त यांचे आदेशान्वये १६/०१/२०२५ रोजी उप आयुक्त, परिमंडळ क्र.४ पुणे महानगरपालिका यांचे नियंत्रणाखालील कोंढवा येवलेवाडी कार्यालया अंतर्गत सायंकाळी ०४.३० ते ०७.३० या कालावधीत व्ही. आय. टी. कॉलेज चौक ते कान्हा हॉटेल या परिसरात अतिक्रमण व अनधिकृत बांधकाम निर्मुलन, प्लास्टिक प्रतिबंधात्मक, परिसर स्वच्छता कारवाई करण्यात आली. सदरची कारवाई पृथ्वीराज बी. पी., अतिरिक्त महापालिका आयुक्त (इ), जयंत भोसेकर, उप आयुक्त (परिमंडळ क्र.४) व लक्ष्मण कादबाने, महापालिका सहाय्यक आयुक्त यांचे नियंत्रणाखाली संयुक्त कारवाई करण्यात आली.

यावेळी गणेश तारू क्षेत्रीय अतिक्रमण निरीक्षक, मेघा राऊत, अतिक्रमण निरीक्षक व परिमंडळ क्र. ४ कार्यालयाकडील सर्व सहा. अतिक्रमण निरीक्षक, इरफान शेख, बांधकाम निरीक्षक, नकुसा ढोले, प्र. उपअभियंता, सर्व कनिष्ठ अभियंता, राजू दुल्लम व जालिंदर कदम, वरिष्ठ आरोग्य निरीक्षक, सर्व आरोग्य निरीक्षक, अंकुश गायकवाड, आकाशचिन्ह व परवाना निरीक्षक, स्थानिक पोलिस अधिकारी व कर्मचारी, मोकादम, सेवक आदी उपस्थित होते. सदर कारवाई मध्ये ६७ अधिकारी / कर्मचारी सहभागी होते. सदर कारवाई साठी १ जे.सी.बी., ४ ट्रक, २ झेनॉन, १ भरारी पथक वाहनाचा समावेश होता. सदर कारवाईत फ्रंट मार्जिन तसेच रस्ता व पदपथावरील अतिक्रमणे काढण्यात आली.

सदर कारवाईत ४० काउंटर, २ हातगाडी, ६ सिलेंडर तसेच इतर साहित्य जप्त करून अतिक्रमण गोडाऊन येथे जमा करण्यात आले. व सदर कारवाई मध्ये कोंढवा येवलेवाडी क्षेत्रीय कार्यालयातील घनकचरा व्यवस्थापन विभागातील सेवकांद्वारे अस्वच्छता / प्लास्टिक वापराबाबत एकूण २६ नागरिकांवर कारवाई करून रक्कम रुपये २३,७००/- इतकी दंडात्मक कारवाई करण्यात आली. तसेच सदर कारवाई मध्ये कोंढवा येवलेवाडी कार्यालयातील परवाना व आकाशचिन्ह विभागातील सेवकांद्वारे बोर्ड, बॅनर, फ्लेक्स, लॉलीपॉप, केऑक्स इत्यादींवर कारवाई करून रक्कम रुपये २०००/- इतका दंड वसूल करण्यात आला.