लोणी काळभोर दस्त करुन देण्याच्या बहाण्याने एका तीस वर्षीय महिलेचा विनयभंग

दस्त करुन देण्याच्या बहाण्याने एका तीस वर्षीय महिलेला एका हॉटेलमध्ये बोलावून तिचा विनयभंग केल्याची घटना कवडीपाट येथे घडली आहे. याप्रकरणी लोणी काळभोर पोलीस ठाण्यात दोघांविरोधात गुन्हा दाखल झाला आहे. संजय नामदेव झुरुंगे (वय ५५, रा. मांजरी, ता. हवेली, जि. पुणे), तसेच संतोष बापू गायकवाड (वय ४५, रा. शिंदवणे ता. हवेली, जि. पुणे) अशी गुन्हा दाखल झालेल्यांची नावे आहेत. या संदर्भात एका ३० वर्षीय पीडित महिलेने फिर्याद दिली आहे. पोलिसांनी दिलेल्या माहितीनुसार, डिसेंबर २०२४ महिन्याच्या पहिल्या आठवड्यात झुरुंगे व गायकवाड या दोघांनी संगनमत करून पीडितेला रद्दखताचा दस्त करुन देण्याचे आमिष दाखवून चर्चेसाठी कवडीपाट टोलनाका परिसरातील एका हॉटेलमध्ये बोलावून घेतले. पीडित महिला तेथे आल्यानंतर झुरुंगे व गायकवाड या दोघांनी तिचा विनयभंग केला. तसेच तिला शिवीगाळ करून अँट्रॉसीटीचा गुन्हा दाखल करण्याची धमकी दिली. या प्रकरणी लोणी काळभोर पोलिस अधिक तपास करत आहेत.