फुरसुंगी घरावर कर्ज काढून देतो, असे सांगून घरावरच ताबा

पुणे : घरावर कर्ज काढून देतो, असे सांगून घराची कागदपत्रे घेऊन कर्ज काढून न देता, घर खरेदी करण्याचा बहाणा करुन ११ महिन्यांचा भाडेकरार करुन घराचा ताबा घेतल्याचा प्रकार समोर आला आहे.

याबाबत अंकुश हनुमंत पवार (वय ३३, रा. रामनगर, रामटेकडी, वानवडी) यांनी हडपसर पोलीस ठाण्यात फिर्याद दिली आहे. त्यावरुन पोलिसांनी नितीन अशोक गायकवाड (वय २९, रा. संकेत विहार स्वराज्यनगर, फुरसुंगी) याच्यावर फसवणुकीचा गुन्हा दाखल केला आहे. हा प्रकार संकेत विहार येथे ३ एप्रिल २०२२ पासून १८ जानेवारी २०२५ दरम्यान घडला आहे.

याबाबत पोलिसांनी दिलेल्या माहितीनुसार, फिर्यादी हे चालक म्हणून काम करतात. त्यांचे संकेत विहार येथे घर आहे. सध्या ते रामटेकडी येथे भाड्याच्या घरात राहतात. आरोपी नितीन गायकवाड यांनी अंकुश पवार यांना घरावर बँकेकडून कर्ज काढून घेतो, असे भासवून त्यांचा विश्वास संपादन केला. घराची कागदपत्रे घेतली. कर्ज काढून न देता फिर्यादी यांचे घर खरेदी करण्याचा बहाणा केला. त्यासाठी दोन वेळा इसार पावती करुन ११ महिन्याचा भाडेकरार करुन त्या घरात रहात आहे. इसार पावतीमध्ये ठरल्याप्रमाणे व्यवहार पूर्ण न करता घराचा ताबा घेऊन फिर्यादीची फसवणूक केली. सहायक पोलीस निरीक्षक प्रविण अब्दागिरे तपास करीत आहेत.