‘समलिंगी’ तरुणांना भेटायला बोलावून निर्जन स्थळी नेऊन लूटमार करणाऱ्या टोळीला पोलिसांकडून अटक

पुणे : ‘समलिंगी’ तरुणांना भेटायला बोलावून निर्जन स्थळी घेऊन जात लूटमार करणाऱ्या टोळीला नांदेड सिटी पोलिसांनी अटक केली. भारत किसन धिंडले (वय १८, रा. सांगळे घाट, धायरी) याला अटक केली, त्याच्या तीन अल्पवयीन साथीदारांना ताब्यात घेतले आहे.

‘डीएसके रस्त्यावर काही तरुण गाड्या अडवतात. माझ्या घरी मेडिकल इमर्जन्सी आहे, असे सांगून गाडीत बसतात. गाडी घरी घेण्यास सांगून निर्जन ठिकाणी नेऊन मारहाण करून पैसे, मौल्यवान ऐवज लुटतात,’ असा मेसेज समाजमाध्यमांवर प्रसृत झाला होता. नांदेड सिटी पोलिस ठाण्यातील अंमलदार पुरुषोत्तम गुन्ला, अक्षय जाधव यांना मिळालेल्या बातमीच्या अनुषंगाने त्यांनी सापळा लावून धिंडवे आणि तीन अल्पवयीन मुलांना पकडले. त्यांच्याकडे चौकशी केल्यावर तेच लूटमार करीत असल्याचे स्पष्ट झाले.आरोपी तरुण समलिंगी लोकांशी एका ॲपद्वारे मैत्री करतो. त्यांना भेटायला बोलावतो. त्यानंतर निर्जन ठिकाणी घेऊन जातो. तेथे अचानक त्याचे तीन मित्र येतात. ते हत्याराचा धाक दाखवून त्या समलिंगी व्यक्तीकडील पैसे, मोबाइल, सोने आणि महत्त्वाचा ऐवज काढून घेतात. बदनामी होईल या भीतीने हे लोक तक्रारही करीत नाहीत. त्यामुळे आरोपींचे फावते.

पोलिसांनी धीर दिला, म्हणून…

नांदेड सिटी पोलिस ठाण्यात एका ३२ वर्षांच्या हॉटेल व्यावसायिकाने तक्रार दिली आहे. त्यांच्याबाबत १४ जानेवारीला सायंकाळी डीएसके विश्व शाळेजवळ लूटमारीचा प्रकार घडला होता. तक्रारदाराशी १३ जानेवारीला एका मुलाने संपर्क साधला होता. त्यानंतर ते दोघे एकमेकांबरोबर बोलू लागले. त्या मुलाने तक्रारदाराला डीएसके विश्व येथे बोलावले. तक्रारदार तेथे गेले असताना त्या मुलाने त्यांची दुचाकी तेथेच लावायला सांगितली. तो मुलगा त्यांना त्याच्या दुचाकीवरून शाळेच्या मागील बाजूस घेऊन गेला. त्या ठिकाणी तिघे जण अचानक आले.

ते आल्यावर या मुलाने तक्रारदाराला शिवीगाळ करून खिशातील पैसे, मोबाइल आणि दोन्ही कानांतील सोन्याची बाळी काढून घेतली. तक्रारदाराने विरोध केल्यावर त्यांना शस्त्राचा धाक दाखवला. ‘यूपीआय’द्वारे बँक खात्यातून पाच हजार रुपये जबरदस्तीने ट्रान्स्फर करून घेतले. त्यांच्याकडील २४ हजार ५०० रुपयांचा ऐवज लुटला आणि ते पळून गेले. या प्रकाराने तक्रारदार घाबरला. बदनामी होईल; म्हणून त्यांनी भीतीपोटी कोणाला हा प्रकार सांगितला नव्हता. पोलिसांनी त्यांना धीर दिल्यानंतर संबंधिताने तक्रार दिली