बाणेरमध्ये बांधकाम मजुराचा गळफास देऊन निघृण खून, आरोपी गजाआड

पुणे: बाणेरमध्ये बांधकाम मजुराचा गळफास देऊन निघृण खून करण्यात आल्याचा प्रकार मंगळवारी (दि. १८) उघडकीस आला.

यासंदर्भात दोन संशयितांना पोलिसांनी ताब्यात घेतले आहे. सुनील टुडू (वय ३२, रा.बनकी जोर, झारखंड, सध्या रा. लेबर कॅम्प, बाणेर) हे मृताचे नाव आहे.

दारूच्या नशेत अथवा वैयक्तिक संबंधांच्या वादातून हा प्रकार घडला असावा असा पोलिसांचा अंदाज आहे. बाणेरमधील पॅनकार्ड क्लबच्या परिसरात एका तरुणाला गळफास देऊन लटकवण्यात आल्याचा प्रकार मंगळवारी सकाळी स्थानिक नागरिकांच्या निदर्शनास आला.

नागरिकांनी या घटनेची माहिती दिल्यावर चतुःशृंगी पोलीस ठाण्याचे अधिकारी पथकासमवेत घटनास्थळी पोहचले. त्यांनी टुडू याला फासावरून काढून ससून रुग्णालयात दाखल केले. मात्र, त्यापूर्वीच तो मरण पावला असल्याचे वैद्यकीय तपासणीत आढळले. यासंदर्भात पोलिसांनी तपास केल्यावर टुडू याचा ठावठिकाणा व वैयक्तिक माहिती पुढे आली. तो इमारतीच्या बांधकामावर मजुरी काम करायचा. तेथील दोघा मजुरांसमवेत तो रात्री गप्पा मारत होता. त्यांनी त्याला मारहाण करून गळफास दिल्याची माहिती पोलीस तपासात पुढे आली. त्यानुसार दोन जणांना चौकशीसाठी ताब्यात घेण्यात आले आहे.

चतुःशृंगी पोलीस या प्रकरणी पुढील तपास करीत आहेत.