पुण्यात तब्बल 10 कोटींच लाल चंदन जप्त, कंटेनरसह चालक ताब्यात

पुणे: पुणे पोलिसांनी चंदनतस्करीचा ट्रक पकडला असून आता या तस्करीच्या मास्टरमाईंड पर्यंत पोहोचण्यासाठी तपास सुरू आहे. कर्नाटकची राजधानी असलेल्या बंगळुरूहून मुंबईच्या दिशेनं निघालेलं कंटेनर भरुन चंदन जप्त करण्यात आलं आहे. आता, या चंदनतस्कीरच्या सिंडीकेट मेंबरचा शोध सुरु झाला. याप्रकरणी पुण्यातील पोलिसांनी सध्या चालकासह एकाला ताब्यात घेतलं असून त्यांच्याकडून प्राथमिक चौकशी करण्यात येत आहे.

पुणे- मुंबई द्रुतगती मार्गावरील उर्से टोल नाक्यावर पिंपरी चिंचवड पोलिसांनी ही कारवाई केली आहे. जेएनपीटीवरुन हे चंदन आंतरराष्ट्रीय बाजारात जाणार होतं, अशी शक्यता वर्तवली जात आहे. तब्बल 10 ते 12 कोटी रुपयांचं हे चंदन असेल अशी प्राथमिक माहिती आहे. याप्रकरणी, पुण्यातील गुन्हे विभागाकडून चंदनाचं वजन केलं जातं आहे. त्यानंतरच हे चंदन किती आहे? आणि चंदनाची बाजारातील किंमत किती, व इतर बाबींचा उलगडा होईल. दरम्यान, हे चंदन लाल चंदन आहे की चंदनातील नेमका कुठला प्रकार आहे याबाबतही पोलिसांकडून तपास केला जात आहे.