वाढदिवस साजरा करताना सत्तुर आणि गावठी कट्टा बाळगणारा १९ वर्षीय तरुण गजाआड

पुणे: सार्वजनीक ठिकाणी वाढदिवस साजरा करताना सत्तुर आणि गावठी कट्टा बाळगणाऱ्या एका १९ वर्षीय तरुणास अटक करण्यात आली. तर त्याच्या अल्पवयीन साथीदारास ताब्यात घेण्यात आले. वाढदिवसाचे चित्रीकरण समाजमाध्यमावर टाकण्याच्या हेतूने शस्त्र जवळ बाळगण्यात आले होते.

अनिकेत दिपक गायकवाड (१९ रा. काशेवाडी, भवानी पेठ) असे अटक तरुणाचे नाव आहे. त्याच्याविरुध्द खडक पोलीस ठाण्यात आर्म ॲक्टनूसार गुन्हा दाखल करण्यात आला आहे.

पोलीसांनी दिलेल्‍या माहितीनुसार, खडक पोलीस ठाण्याच्या हद्दीत गस्त घालत असताना पोलीस हवालदार हर्षल दुडम व अंमलदार कृष्णा गायकवाड यांना खबर मिळाली की, घोरपडे पेठ येथील पीएमसी कॉलनीत अनिकेत गायकवाड हा पिस्तुल व लोखंडी सत्तूर घेऊन आला आहे. त्याचा वाढदिवस असून तो केक कापण्यासाठी उभा आहे. त्यानूसार खडक पोलिसांनी काही पथके बनवून संबंधीत ठिकाणी सापळा रचला.

तो त्याच्या साथीदारांसह केक कापण्याच्या तयारीत असतानाच त्याची पोलिसांशी नजरा नजर झाली. यानंतर तो साथीदारांसह पळून जात असताना पथकाने त्याला अल्पवयीन साथीदारासह पाठलाग करुन पकडले. यावेळी पोलीस कर्मचाऱ्यांना थोडी दुखापतही झाली. त्याची अगंझडती घेतली असता पॅन्टमध्ये एक पिस्तूल व दुचाकीत सत्तूर सापडला. त्याचे वडिल ठेकेदार असून त्याचे शिक्षण आठवी पर्यंत झाले आहे. त्याने पिस्तूल कोठून मिळवले याचा शोध घेण्यात येत आहे.

सदरची कारवाई वरिष्ठ पोलीस निरीक्षक शशिकांत चव्हाण, पोलीस निरीक्षक शर्मिला सुतार, पोलीस निरीक्षक मनोजकुमार लोंढे सहायक निरीक्षक अनिल सुरवसे, उपनिरीक्षक प्रल्हाद डोंगळे , पोलीस अंमलदार हर्षल दुडम, किरण ठवरे, कृष्णा गायकवाड, विश्वजीत गोरे, अक्षयकुमार वाबळे, योगेश चंदेल, मयूर काळे, शोएब शेख यांचे पथकाने केली आहे.